Аёллар қалбини нафақат кучли харизмаси, балки ўткир ақли билан ҳам забт этган актёр — Бен Аффлек ҳақида 20 та қизиқарли факт (фото)

Болалигидаёқ Бен Аффлек кинематография соҳасида катта муваффақиятларга эришди. Унинг шахсий ҳаётини ҳам жуда қизиқарли деб аташ мумкин, чунки бир вақтлар актёр Гвинет Пелтроу билан учрашган, Женнифер Гарнерга уйланган ва ҳозир у Женнифер Лопес билан бахтли ҳаёт кечирмоқда. Бен Аффлек нафақат муваффақиятли актёр, балки жуда жиддий режиссёр ҳам.

• Бўлажак «Оскар» совриндорининг онаси бошланғич мактаб ўқитувчиси, отаси эса тирикчилик сабаб автомеханик, электрчи ва фаррош бўлиб ишлаган ёш драматург эди. Бен 11 ёшга тўлганда, ота-онаси ажрашишади.
• 7 ёшида Аффлек китобсевар, иқтидорли бейсболчи ва келажакдаги актёр эди. 1979 йилда у ўзининг дебют фильми бўлган «Қоронғи кўча охири» фильмида рол ўйнайди. Картинада суратга тушган 7 ёшли актёр опаси ролини ўйнаган 19 ёшли қизни севиб қолади. Кейинчалик у «Мимининг саёҳати» телекўрсатуви юлдузига айланади.

• Бен акаси Кейси ва онаси билан биргаликда тез-тез спектаклларга борарди ва умуман олганда, оила доимо санъат оламидаги одамлар билан ҳамфикр эди. Болалигидаёқ Бен уй фильмларини суратга олишни бошлайди. Бироз вақт ўтгач, унинг актёрлик маҳоратидан дарс берувчи ўқитувчиси бўлажак актёрни «жуда ақлли ва ўта қизиқувчан бола» деб таърифлайди. Кейинчалик болакай рекламаларда суратга туша бошлайди. Онаси у ўқитувчи бўлади, деб умид қилади, чунки у актёрликни бемаъни касб деб ҳисобларди.

• 13-14 ёшида у катталар билан бемалол суҳбатлашарди. Бен онасини унинг коллежда ўқиши учун йиғган жамғармаларини банкдан олишга кўндиради. У актёр бўлишни орзу қилган Мэтт Деймон билан айрилмас дўст тутинади. Улар ҳаттоки биргаликдаги банк ҳисобига эга бўлиб, кастингларга бориш учун поэзд ёки самолёт чипталарига пул йиғишарди.

• Болалигидаги ролларни Аффлек профессионал даражада ўйнаган, бироқ актёр тан олганидек, кинога «тасодифан» кириб келган. Коллежда ўқиб юрган вақтларида ҳам Бен фильмларда рол ўйнашни давом эттиради, унинг роллари «бир-биридан бемаъни» эди. 1995 йилда у «Машҳурлик жилоси» фильмида биринчи марта бош ролни ўйнайди.
• Бир мунча вақт Аффлек молиявий қийинчиликларни бошдан кечиради ва тез-тез Мэтт Деймоннинг уйидаги диванда тунаб қоларди. Аффлекнинг карьераси «Такасалтанглар» (1995) фильми чиққандан сўнг кескин кўтарилади ва «Эмининг ортидан» (1997) фильмидаги роли уни томошабинларга танитди.

• Ҳақиқий машҳурлик унга «Доно Уилл Ҳантинг» (1997) фильми экранларга чиққандан кейин келди. Фильм сценарийсини 1992 йилда Мэтт Деймон Гарвард университетида драма курси учун ёзганди. Кейинчалик, икки дўст биргаликда сценарий устида ишлай бошладилар.
• Аффлекнинг тан олишича, бу сценарийни ёзишга у ва Мэтт ўзлари хоҳлаган ролларни ололмагани туртки бўлган, шунинг учун улар ўз фильмларини яратишга қарор қилишган. Айтганча, айрим эпизодлар актёрларнинг ҳақиқий ҳаётидан олинган. Масалан, фильм бош қаҳрамони худди Беннинг отаси каби нуфузли таълим муассасасида фаррош бўлиб ишлаган. 25 ёшида Аффлек «Энг яхши оригинал сценарий» учун «Оскар»ни қўлга киритади ва бу мукофотни қўлга киритган энг ёш одамга айланди.

• Бунинг ортидан «Армагеддон» фильмида суратга олиш бошланди. Бен фильмда суратга тушишидан олдин картина продюсери Аффлекдан озишини, қорайишини ва тишларини тўғрилашини талаб қилади. Бен ҳеч бир муаммосиз бунга рози бўлади. Айтганча, бу актёрнинг фарзандлари кейинроқ томоша қилган ягона лента. У тижорат соҳасида ҳам муваффақият қозонади.

• 1997 йилдан 1999 йилгача Аффлек Гвинет Пелтроу билан ишқий муносабатда бўлади. Кейинчалик улар муносабатларини тикладилар, лекин яна ажралишди. Айтганча, ажрашганидан кўп йиллар ўтгач, актриса улар яхши дўст бўлиб қолишларини ва Аффлек 45 ёшгача у учратганлари ичида энг ақлли одам эканлигини алоҳида таъкидлайди.

• 2003 йилда актёр «Балойи азим» фильмида рол ўйнайди, бу фильм танқидчиларнинг номақбул баҳоларига сазовор бўлди ва Аффлекнинг ўзи бу унинг фильмографиясида афсусланган ягона лента эканлигини айтади. Аммо «Балойи азим» фильмининг суратга олиш майдончасида у Женнифер Гарнер билан дўстлашади ва 2005 йилда улар турмуш қуради.
• Бу никоҳдан уларнинг 3 нафар фарзанди бор эди. 12 йиллик турмушдан кейин актёрлар ажрашиш учун ариза беришади. Кейинчалик, Аффлек бу ажралиш «унинг ҳаётидаги энг катта оғриқ» эканлигини айтади ва у ҳеч қачон ажралиш ҳақида ўйламаганлигини таъкидлайди.

• 2001 йил охирида Бен Женнифер Лопес билан танишади, улар дастлаб дўстона муносабатда эди. Орадан бир йил ўтгач қўшиқчи ўша пайтдаги эри Крис Жуддан ажрашиш учун ариза бергач, Бен билан муносабатлари бошланади.
• Таблоидлар бу жуфтликка дарҳол Беннифер деб ном беради. Лопес ҳам севгилиси илҳомлантирилган ва унга бағишланган ва «Бу мен ... Кейин» альбомини чиқаради. Улар кейинроқ унаштирилади ва 10 ойдан кейин «ОАВнинг ҳаддан ташқари эътибори туфайли» унаштирув бекор қилинади. 2004 йилнинг бошида жуфтлик муносабатларига нуқта қўяди, аммо уларнинг ҳикояси шу билан тугамайди.

• Бен Аффлек 2007 йилда режиссёр сифатида дебют қилади. У «Алвидо, қизалоқ, хайр» фильмини яратади, картина танқидчиларнинг ижобий баҳоларига сазовор бўлади, бироқ унинг кейинги фильми «Ўғрилар шаҳри» (2010) каби машҳур бўлмайди. Катта касса тўплаган ушбу фильм чиққандан сўнг, танқидчилар Бенни жиддий режиссёр деб атай бошлайдилар.

• 2012 йилда Аффлекнинг «Арго операцияси» фильми экранларга чиқади. Журналистлар бу картинани 2012 йилнинг энг яхши фильмларидан бири деб аташади ва Аффлекнинг режиссёрлик фаолиятига жиддий қаарй бошлайдилар. Картинанинг катта тижорий муваффақиятга эришишади — у «Энг яхши фильм», «Энг яхши мослаштирилган сценарий» ва «Энг яхши монтаж» номинацияларида «Оскар» ва бир қанча кинематография мукофотларини қўлга киритади. Айтганча, бутун фаолияти давомида Аффлек икки марта «Оскар» мукофотига номзод бўлган ва икки марта мукофот олган.

• Соғлиғи билан боғлиқ муаммолар туфайли актёр қисқа муддатга кино оламидан кетди ва 2019 йилда қайтиб келди. Кейинчалик у танқидчилар томонидан ёмон баҳоланган бир нечта фильмларда рол ўйнади, масалан, «У хоҳлаган охирги нарса» фильми каби. Ўша пайтда танқидчилар Аффлекка чарчаган ва ҳиссиётсиз деб таъриф беришган.
• 2020 йилда у «Ташқарида» фильмида бош ролни ўйнади. Актёрнинг бу иши томошабинлар олқишига сазовор бўлди. Кейинчалик «Сўнгги дуэл» (2021) фильми чиқди, унинг сценарийси Аффлек, Деймон ва Никол Холофсенер томонидан ёзилган. Бир танқидчи таъкидлаганидек, у ўзи учун энг қизиқарли персонажни ярата олди.

• Аффлек ва Лопеснинг муносабатларига нуқта қўйилганига қарамай, жуфтлик омма олдида мулоқот қилишда давом этишди ва бир-бирлари ҳақида жуда илиқ гапиришди. Лопес билан ажрашганидан бир неча йил ўтгач, Аффлек улар бир-бирларини севиб хато қилишганини айтди.
• Аммо, афтидан, йиллар ўтиб, у фикрини ўзгартирди, чунки 2021 йилда уларнинг муносабатлари тикланди. Айримларнинг айтишича, улар ўртасида ғайриоддий «кимё» бор эди. Тўйдан бир кун олдин уни тарк этишга қарор қилганидан 19 йил ўтгач, севишганлар ваниҳоят турмуш қурди.

• Шу билан бирга, Аффлекнинг актёрлик карьераси ўсишда давом этди. 2021 йил охирида Жорж Клуни режиссёрлигидаги Бен асосий роллардан бирини ижро этган «Нафис бар» фильми экранларга чиқди. Клуни ўз танловини бу актёрни жуда ақлли деб билиши билан изоҳлади. Журналистлардан бири ҳатто Аффлекни «шу рол учун туғилган» деб айтди.
• 2022 йилда Бен ўзининг режиссёр сифатидаги 5-фильмини суратга олишни бошлади. Фильм сценарийсини Мэтт Деймон билан ҳамкорликда ёзган. 2023 йилда эса актёр «Флеш» фильмидаги суперқаҳрамон Бетмен ролида яна экранларга қайтади.