AQSh sudi xonanda Jennifer Lopes va aktyor Ben Afflekning ikki yil davom etgan nikohidan keyin ajrimni rasmiylashtirdi, deb yozadi “Pravila jizni” nashri. Sobiq er-xotin moliyaviy masalalar bo‘yicha kelishuvga erishdi va ortiqcha sud ishlarisiz hamda e’tirozlarsiz nikohni bekor qildi.
Jennifer Lopes va Ben Afflekning hech biri aliment to‘lamaydi, aktyor Artists Equity prodyuserlik kompaniyasidagi ulushini saqlab qoladi, Lopes esa o‘z loyihalarini amalga oshirishda davom etadi.
Qayd etilishicha, sobiq juftlik birgalikda xarid qilgan villa borasidagi kelishmovchiliklar ham bartaraf etilgan. Ular qanday kelishuvga kelgani hozircha e’lon qilinmagan.
Ma’lumki, 2023-yilda 60 million dollarga xarid qilingan hashamatli uy hozirda sotuvga qo‘yilgan. TMZ ma’lumotlariga ko‘ra, hozircha uyni olishga talabgorlar yo‘q. Kelgusi oyda sud hay’ati ajrimni to‘liq ma’qullagach, Lopes Afflek familiyasidan rasman voz kechadi.
Juftlikka yaqin bo‘lgan manbalarning so‘zlariga ko‘ra, Ben Afflek va Jennifer Lopes to‘ydan oldin nikoh shartnomasi tuzmagan ekan. Yulduzlarning darajasiga qarab, bunga ishonish qiyin. Odatda bunday nikohdan oldin bo‘lajak er-xotin ko‘p sahifali shartnomalar tuzishadi. Ammo Afflek va Lopes nimagadir buni e’tiborsiz qoldirgan.
Do‘stlarining so‘zlariga ko‘ra, aynan Jennifer Lopes nikoh shartnomasini tuzishda qat’iy turmagan. Bu uning to‘rtinchi nikohi bo‘lgani uchun Jennifer bu safar hammasi yaxshi bo‘lishiga ishongan. Ayniqsa, Afflek bilan 20 yildan beri tanish bo‘lganini inobatga olsak, bu vaqt davomida ular bir-birlarini yaxshi bilib olishga ulgurgan. Ammo nikohning birinchi yilidayoq xonanda bu qaroridan afsuslana boshlagan.
Yulduzli juftlik munosabatlarining tarixi 2002-yilga borib taqaladi, 2004-yilda ular nikohdan o‘tishi kerak bo‘ladi, ammo Lopes to‘yni bir necha kun qolganda to‘xtatadi. Oradan qariyb yigirma yil o‘tib — 2021-yil iyul oyida Lopes va Afflek yana birga ekanini tasdiqladi. 2022-yil 16-iyulda esa juftlik munosabatlarini rasman qonuniylashtirdi.
2024-yilning yozida Lopes Afflek bilan ajrashish uchun ariza bergan. Ariza sudga 20-avgust kuni taqdim etilgan — aynan shu sanada 2022-yilda Lopes va Afflek nikoh marosimini o‘tkazgan.
Aktrisa ajrashganidan keyin ham sobiq eridan moddiy yordam olishdan bosh tortgan.
Izoh (0)