Женнифер Лопес ва Бен Аффлек ажралиш арафасида экани ҳақида бир нечта хорижий таблоидлар ўз манбаларига асосланиб ёзмоқда.
Эр-хотин узоқ вақт давомида бирга кўринмаган
People нашрининг таъкидлашича, Женнифер Лопес ва Бен Аффлек тахминан 7 ҳафтадан бери омма олдида кўринмайди. Уларни охирги марта 31 март куни Нью-Йоркда тушлик қилаётганларида кўришган.
Met Gala’да ҳам Женнифер ёлғиз эди — хонанда жуда озғин ва чарчаган кўринарди, бу, албатта, интернетда қизғин муҳокамаларга сабаб бўлди. Бир кун олдин папарацсилар Лопесни рақс студиясига Аффлексиз кетаётганини кадрларга муҳрлаган эди. Умуман олганда, бу далил бўлолмайди, лекин ажралиш ҳақидаги миш-миш болалаган бир пайтда бу факт мухлисларни хавотирга солди.
Айтишларига қараганда, Бен иш билан жуда банд — у “Гладиатор-2” фильмини суратга олаётгани учун Met Gala’га ҳам кела олмаган.
Аффлек севгилисиникидан кетган, Лопес эса янги уй қидирмоқда
InTouch билан суҳбатлашган манбанинг фикрича, жуфтлик икки йиллик турмушидан кейин яна ажралишга тайёрланмоқда. Таъкидланишича, Аффлек яқинда Беверли-Хиллздаги 60 миллион долларлик уйидан кўчиб кетган.
“Бен уйдан аллақачон кўчиб кетган — энди улар икки йил давомида қидирган орзудаги уйларини сотишларига тўғри келади. Ҳозирда Бен иши ва болаларига кўпроқ эътибор қаратган. Улар ҳеч қачон бир-бирларини севишдан тўхтамайди, лекин Лопес эрини бошқаролмайди, Бен ҳам хотинини ўзгартиролмайди. Бу узоқ давом этиши мумкин эмас”, — дейди нашр манбаси. Унинг қўшимча қилишича, бу сафар Бен “айбдор эмас”.
Бундан ташқари, Аффлек 16 май куни Лос-Анжелесдаги уйларидан биридан чиқиб кетаётганида камера объективига тушиб қолган — актёр у ерда тунаб қолган, деб тахмин қилиняпти. Айтишларига қараганда, актёр аллақачон бошқа уйга кўчиб ўтган.
Бундан ташқари, TMZ’нинг ёзишича, катта эҳтимол билан, Лопес ҳам янги уй қидирмоқда. Бошқа бир куни қўшиқчини ишдаги ҳамкори Элейн Голдсмит-Томас ҳамроҳлигида Беверли-Хиллздаги қасрдан чиқиб кетаётганини кўришган.
Лопес носоғлом муносабатлар ҳақидаги постга лайк босган
Instagram’даги ўша постда умр йўлдошнинг носоғлом муносабатларга олиб келиши мумкин бўлган фазилатлари тасвирланган. “Вақтингизни ҳурмат қилмайдиган, ўзини қадрламайдиган, ҳалоллик ва ҳиссий етукликка эга бўлмаган одам билан соғлом муносабатда бўлиш мумкин эмас”, дейилган. Лопес бу гапларга лайк босган, дейди PageSix.
Жей Ло суратга олдирган ҳужжатли фильм
Айтишларича, можаро қўшиқчининг февраль ойида Amazon Prime’да чиққан “Ҳеч қачон айтилмаган буюк севги ҳикояси” ҳужжатли фильми туфайли бошланган.
Таъкидланишича, Бен шахсий дахлсизликни хоҳлаган — Женнифер кўпинча уни ижтимоий тадбирларда қатнашишга мажбурлаган, шахсий муносабатлари ҳақида очиқ-ойдин интервьюлар берган. Бундан ташқари, у фильм ижодкорларига Беннинг унга ёзган мактубларини кўрсатган.
“Мен унда ҳақиқатан ҳам гўзаллик, шеъриятни кўрганман, бу ҳеч қачон айтилмаган энг буюк севги ҳикояси эди. Аммо уни суратга олаётган экансиз, бу унинг аллақачон айтиб бўлинганини англатади”, — деган актёр. Айнан шу эпизод фильмга киритилган.
Женнифер Лопес ва Бен Аффлек 2002 йилда учраша бошлаган. Жуфтлик мухлислар ва оммавий ахборот воситаларида шу қадар машҳур эдики, уларни тез орада Беннифер деб атай бошлашади.
Улар илк бор 2002 йилда унаштирилган, бироқ тўйни кейинга қолдиришга тўғри келган. 2004 йилда эса Лопес ва Аффлек ажрашишга қарор қилган. Юлдузлар 2021 йилда яна топишишди, 2022 йил апрелида эса уларнинг унаштирилгани маълум бўлди.
Изоҳ (0)