Хонанда ва актёрнинг севги ҳикояси бутун дунё эътиборида бўлди. Улар тўйдан атиги 3 кун олдин ажралишди ва 19 йилдан сўнг тўсатдан муносабатлари тиклангани ҳақида эълон қилишди. Тўй ҳам тез орада бўлиб ўтди, яқинда эса юлдуз ҳужжатли фильм чиқарди — унда Бен Аффлек билан ишқий муносабатлари тафсилотларини очиқчасига айтиб, кўплаб сирларни очиб берди.
Женнифер ва Бен 2002 йилда суратга олиш майдончасида танишган.
Аввалига биз жуда яхши дўст эдик, — дейди Бен Аффлек, — у турмушга чиққан эди, ишқий муносабатлар ҳақида хаёлимизга ҳам келтирмасдик. Бу эса бир-биримизни ёлғонсиз билиш имконини берди. Биз бир-биримизда яхши таассурот қолдиришга ҳаракат қилмадик.
Ўша пайтда Женнифер севгисини ижоди орқали изҳор қилган. У “Dear Ben” қўшиғини актёрга бағишлайди, бу “Менинг эҳтиросим, менинг севгим, дўстим ва қиролим” каби сўзларни ўз ичига олган романтик изҳор эди.
2002 йил охирида Бен унга турмуш қуришни таклиф қилади.
Уйга киргач, ҳайратда қолдим: бутун уй атиргул гулбарглари билан қопланганди. Ҳамма жойда гулдасталар бор эди. Мен буни кутмагандим, — деб эслайди Женнифер ўша кунни.
Ҳужжатли фильмда эр-хотин биринчи марта тўйдан 3 кун олдин содир бўлган ажралиш сабаблари ҳақида гапиради. Бунга уларнинг муносабатларининг ошкор этилиши натижасида юзага келган ҳаддан ташқари босим сабаб бўлган.
Биз ажралишимиз керак эди, чунки бундан қандай ўтишни билмасдик. Иккаламиз ҳам ўзимизни англашимиз лозим эди, — деб тан олади Женнифер.
2002 йилдаги “Jenny from the Block” қўшиғи клипида Бен ва Женнифер ҳамма жойда папараццилар томонидан кузатиб юриладиган машҳур жуфтлик сифатида пайдо бўлишлари тасодиф эмас. Бир йил ўтгач эса улар тўй қолдирилгани ҳақида баёнот беради: “ОАВнинг тўйимизга ҳаддан ташқари эътибор қаратаётгани сабабли тўйни кечиктиришга қарор қилдик”. 2004 йилда улар муносабатлардаги танаффусни расман эълон қилади.
Ҳужжатли фильм эпизодларидан бирида Бен Женнифердан айрилиқ деярли 20 йил давом этгани учун уни кечирганми ёки йўқлигини сўрайди. Бу саволга хонанда шундай жавоб беради:
Менимча, сендан анчагача ғазабланганман. Аммо бу юрак оғриғи иккаламизни ҳам ўзимизга келишга ва яхши инсон бўлишга мажбур қилди. Мен сени бутунлай кечирдим.
Умримнинг охиригача у билан бирга бўлишни хоҳлаётганимни билардим. Лекин бунга эриша олмаймиз деб қўрқардим. Ҳақиқатан ҳам севган инсонингдан воз кечиш жуда қийин. Ўша пайтда етарлича етук эмас эдик, — дейди юлдуз.
Бендан расман ажралгандан атиги 4 ой ўтгач, Женнифер узоқ йиллик севгилиси, эгизакларининг бўлажак отаси Марк Энтонига турмушга чиқади. Ўз хотираларида у бу иш оғир ажралишдан кейин таскин қидиргани учун содир бўлганини айтади.
2005 йилда Бен ҳам актриса Женнифер Гарнерга уйланади ва бу никоҳдан уч нафар фарзанди дунёга келади.
2021 йил июль ойида эса Женнифер ва Бен Жей Ло ижтимоий тармоқдаги саҳифаларида бирга тушган суратини жойлаштириб, муносабатларини эълон қилади. Бир йил ўтгач, уларнинг тўйи бўлиб ўтади — улар Лас-Вегасда, кичик бир черковда турмуш қуради.
Биз уддаладик. Севги гўзал, севги меҳрибон, севги сабрли экан. Йигирма йиллик сабр, — дейди кейинроқ Жей Ло.
“Ҳеч қачон айтилмаган буюк севги ҳикояси” деб номланган ҳужжатли фильмда хонанда 20 йил олдин ажралишга қарор қилганларида ҳам Бен билан бир-бирини севишдан тўхтамаганликларини айтади.
Бен Аффлек эса ҳеч қачон севгисини омма олдида намойиш қилишни хоҳламаган, бу ҳақда махсус фильмлар яратишни-ку умуман истамаган. У ва Жей Ло яна учраша бошлаганларида актёр “Мен муносабатларимизни ижтимоий тармоқларда эълон қилишни хоҳламайман”, деганди. Тўғри, кейин у бундай шартларни қўйишга ҳаққи йўқлигини ва энг яхшиси муроса қилиш эканини тушунди.
Фильмда жуда кўп таъсирли лаҳзалар бор. Мисол учун, Жей Ло эрига уни уйда тартибсиз, спорт услубидаги шим ва чизиқли пайпоқларда кўришга одатланганлигини айтган эпизод каби. Бен эса дарҳол севгилисига жавобан: “Сен ажойибсан ва мен шунга ўрганиб қолганман”, дейди.
Шунингдек, фильмда бутунлай бошқа Женниферни кўриш мумкин — машҳур юлдуз эмас, балки иш билан бандлиги туфайли эри ва болаларига етарли вақт ажратолмаётганидан ташвишланадиган чарчаган аёл.
Қизиғи шундаки, дўстлари ва танишлари Жей Лони бу лойиҳадан воз кечишга ундаган. Баъзилар ҳатто уни аҳмоқ деб атаган. Мисол учун, таниқли актриса Жейн Фонда дугонасининг шахсий ҳаётини оммага намойиш қилиш фикридан қайтаришга ҳаракат қилади, лекин охирида у қўшиқчини қўллаб-қувватлайди.
Бен Аффлек рафиқаси барчага унинг севги мактублари ёзилган альбомни кўрсатганини билгач, ҳайратда қолади. У бу ҳақда шундай дейди: “Мен ҳар доим бундай шахсий нарсаларни муқаддас деб билганман”. Ахир, бу альбомда унинг биринчи учрашувидан бери сақланган барча қоғоз ва электрон ёзишмалари ҳам бор эди.
Женнифер Беннинг барча севги мактубларини мазмунидан фойдаланишлари учун янги фильм устида ишлаётган ҳамкасбларига беради. “Мен буни бутун дунё билан баҳам кўрмоқчи эдим”, деб тушунтиради қўшиқчи ва актриса эрига ёқмаган бу ҳаракатини.
Айтганча, экспертларнинг таъкидлашича, ҳатто Беннинг тана тили ҳам у ҳеч қачон оммавий ахборот воситалар эътиборини ёқтирмаганлигини кўрсатади. Бундан фарқли ўлароқ, Женнифер ҳис-туйғуларини ва шахсий фикрларини камерада осонгина ифодалайди ва уни сюжетнинг бир қисмига айлантиради.
Бен Аффлек уларнинг шахсий ҳаёти омманинг диққат марказида бўлишидан хавотирда эди. Катта эҳтимол билан, актёр оммавий ахборот воситалари ва жамоатчилик эътибори туфайли яна севгисини йўқотишидан қўрққан.
Аммо хайриятки, унинг қўрқувлари асоссиз эди. Бен шундай дейди:
Мен ҳеч қандай сабабсиз ташвишланардим. Фильм мен ҳақимда эмасди. Бу ўзингизни севиш қобилияти ҳақида — бундай севгига эришиш чиройли шаҳзодани топишдан кўра қийинроқ.
Женнифернинг тан олишича, эри унинг иши учун илҳом париси ролини ўйнашни ёқтирмайди, лекин уни яхши кўради ва мусиқа ёки фильм суратга олишда рафиқасини қўллаб-қувватлайди.
Изоҳ (0)