Республика шошилинч тиббий ёрдам илмий маркази Қашқадарё филиали шифокори операция учун беморидан 3,5 миллион сўм олгани учун 17 миллион сўм жаримага тортилди. Бу ҳақда 2024 йилнинг 27 декабрь куни Жиноят ишлари бўйича Қарши шаҳар суди судьяси Эшимовнинг ҳукми эълон қилинган.
Маълум бўлишича, шифокор беморнинг ўт қопидаги тошни жарроҳлик йўли билан олиб ташлагани эвазига ундан пул талаб қилган.
Шифокор таъмагирлик йўли билан пул маблағи олиб, шундан 300 минг сўм пул маблағларини операциясида кўмаклашган РШТЁИМ Қашқадарё филиали Фавқулодда вазиятлар бўйича бўлими бошлиғига берган вақтида ашёвий далиллар билан ушланган, дейилади суд ҳужжатида.
Ҳолат 2024 йил 3 декабрь куни Жиноят ишлари бўйича Қарши шаҳар судида кўриб чиқилган. 52 ёшли жарроҳ Ўзбекистон Республикаси Жиноят кодекси 214-моддаси 2-қисмининг “б” банди (давлат органи, давлат иштирокидаги ташкилот ёки фуқароларнинг ўзини ўзи бошқариш органи хизматчисининг қонунга хилоф равишда таъмагирлик йўли билан моддий қимматликлар олиши ёки мулкий манфаатдор бўлиши) билан айбланган.
Суд шифокорни ушбу жиноят ишида айбдор деб топиб, унга нисбатан базавий ҳисоблаш миқдорининг 50 баравари миқдорида яъни 17 миллион сўм жарима жазоси тайинлади.
Изоҳ (0)