Афғонистонда биринчи марта юрак тўхташи ва инсультнинг олдини олиш учун ўсимликлардан янги дори тайёрланди. Бу ҳақда “Дарё” мухбири хабар берди.
Кобуллик шифокор аёл 20 йиллик тадқиқот натижасида юрак-қон томир касалликлари ва инсультни даволаш учун ўсимлик асосидаги дори тайёрлаганини айтди. Ушбу дори билан аллақачон 200 дан ортиқ бемор даволанган.
Аёл “Толибон” ҳукуматидан ўзи ишлаб чиқараётган дори-дармонлар миқдорини кўпайтириш ва беморларга етказиш бўйича ҳамкорлик қилишни сўраган ва у бунинг учун пул талаб қилмаган.
Ёши 50 дан ошган Абдул Раҳмоннинг айтишича, 10 йил давомида юрак ишемик касаллиги билан курашганидан сўнг, у касалликдан даволанган. У Афғонистонга Германиядан хизмат сафари билан келганини ва шифокорнинг дорилари ёрдамида касалликни енгганини айтган.
“Юрагим оғрир эди. Чап томонимда оғриқ бор эди. 10-12 кун ичида у камайди. Оғриқ йўқолди ва ўзимни жуда яхши ҳис қилдим. Шифокорни қўллаб-қувватлаш керак, у томонидан даволанган бемор сифатида ундан миннатдорман”, — деди у.
Айни пайтда баъзи бошқа шифокорлар муваққат ҳукуматдан мамлакат шифокорларининг ютуқларини қўллаб-қувватлашни сўрамоқда.
Соғлиқни сақлаш вазирлигининг статистик маълумотларига кўра, дори воситаларининг 93 фоизи Покистон, Эрон, Ҳиндистон, Туркия ва Бангладешдан олиб келинади.
Изоҳ (0)