Кимнингдир саратон касаллигига чалинганидан хабар топсак, ҳар сафар бу ўзимизда содир бўлмайди, деб ўйлаймиз. Аммо касал бўлганлар ҳам, эҳтимол, худди шундай ўйлашган. Касалликнинг дастлабки белгиларида организмни тинглаш ва шифокор билан маслаҳатлашиш жуда муҳимдир. Саратоннинг умумий ва маҳаллий белгилари ҳақида сўз юритамиз, деб ёзади “Новий очаг” нашри.
Саратоннинг умумий белгилари
Паст гемоглобин
Гемоглобин қондаги оқсил бўлиб, кислородни органларга олиб боради. Гемоглобин даражасининг кескин пасайиши онкология белгиси бўлиши мумкин. Агар бирор сабаб билан қон тестидан ўтган бўлсангиз, шифокор ўша сабаб фонида гемоглобин даражасига унчалик аҳамият бермаслиги мумкин, шунинг учун ўзингиз ҳушёр бўлинг. Гемоглобин 70-80 бирлик эканлигини кўрсангиз, онколог билан боғланинг.
Оғриқ
Ҳар бир оғриқнинг сабаби бор. Масалан, ғайриоддий ҳаракатлар ёки нотўғри жисмоний зўриқиш туфайли бел кўпинча оғрийди. Дейлик, фитнес-клубга ташриф буюрган киши мураббий ёллашдан кўра пул тежашга ва мустақил равишда машқ қилишга қарор қилди, лекин машқлар пайтида унинг ҳолатига риоя қилмади. Оғриқ ҳеч қандай сабабсиз пайдо бўлса, узоқ вақт давомида ўтиб кетмаса ва оғриқ қолдирувчи таблеткалар билан яхшиланмаса, шифокорга борган яхшироқдир.
Тўсатдан вазн йўқотиш
Ушбу аломат кўпинча касалликнинг кейинги босқичларида пайдо бўлади, лекин аввалроқ пайдо бўлиши эҳтимолдан ҳоли эмас. Агар тўсатдан вазн йўқотишни бошлаган бўлсангиз, айни пайтда стрессли вазиятларга тушмасангиз, парҳезга ўтмаган бўлсангиз ва спорт билан шуғулланмасангиз, бу онколог билан боғланиш учун сабабдир. Бемор яхши овқатланишни тўхтатади ва сувсизланиш туфайли тезда вазн йўқотади. Чунки ўсимта организмни бошқача ишлашга мажбур қилади, бу эса метаболизмни бузади ва кескин вазн йўқотишига олиб келади. Тўсатдан кузатилган озғинлик қувониш учун сабаб эмас, бу аломатдир.
Ҳолсизлик
Дастлабки босқичларда бемор кундалик ишдан кейин тезда чарчайди, у илгари бу ишларни осонлик билан енгарди. Бунинг сабаби шундаки, ўсимта организмни заҳарлайди, одатдаги жараёнларни ўзгартиради. Ўзингизга разм солинг, чарчоқнинг бошқа сабаблари борми?
Тез-тез касал бўласиз
Саратон пайдо бўлганда, беморнинг иммунитети заифлашади, энди вируслар ва инфекцияларга қарши тура олмайди. Агар тез-тез касал бўлишни бошласангиз, айниқса, иссиқ мавсумда — бу кондиционер туфайли эмас, текширувдан ўтинг. Ушбу аломат саратоннинг дастлабки босқичларида ўзини намоён қилади, аммо уни таниб олиш қийин.
Сариқлик
Токсинлар билан заҳарланиш ёки ҳар қандай жиддий касаллик бўлса, жигар ўз функцияларини тўлиқ бажаришни тўхтатади, ўсма жараёнга аралашади. Бу эса терининг ранги ўзгариб, сарғиш тус олишига сабаб бўлади. Баъзида касаллик бўлса, тери қораяди, сочлар тез ўсишни бошлайди.
Саратоннинг маҳаллий белгилари
Терининг қаттиқлашиши
Кўкрак соҳасидаги ўсимтани мустақил равишда аниқлаш осон, бошқа ҳолларда фақат шифокор буни сезиши мумкин. Агар терининг остида қаттиқлик пайдо бўлганини сезсангиз, ҳар қандай ҳолатда ҳам текширувдан ўтинг.
Қон кетиши
Қон кетиши ички органларнинг нотўғри ишлаётганининг белгисидир. Йўтал, қусиш пайтида қон ажралиши мумкин, бунга эътибор беринг. Кўкаришлар ҳам онкология ҳақида белги беради. Агар тасодифий кўкаришдан кейин бир неча ҳафта ичида ўтиб кетмаса, бу шубҳали.
Йўтал ва овоз бўғилиши
Йўталиш ва овознинг ўзгариши нафас олиш тизимининг саратонини кўрсатиши мумкин, айниқса, йўталганда қон ажралса. Албатта, бундай аломатлар яллиғланиш ва инфекциялардан ҳам келиб чиқади, аммо ҳар эҳтимолга қарши шифокор кўригидан ўтган яхшироқдир. Агар йўтал ва нафас қисилиши икки ҳафтадан ортиқ давом этса, шифокорга мурожаат қилинг.
Холларнинг катталашиши
Агар хол ҳеч қандай сабабсиз ўсишни бошласа, шакли ва рангини ўзгартирса, бу белгидир, уни зудлик билан шифокорга кўрсатиш керак. Эҳтимол, бу хол эмас, балки меланома, яъни тери саратони. Агар терингизда бир неча ҳафта давомида йўқолмайдиган ғалати излар ёки нотекис холлар бўлса, онкологга мурожаат қилинг.
Шифокор кўригидан ўтинг
Агар ўзингизда ушбу аломатлардан бирини сезсангиз, албатта, шифокор кўригидан ўтинг. Иложи борича эртароқ келажагингиз ҳақида қайғуришни бошланг.
Изоҳ (0)