Қозоғистонда 25 декабрь куни Бокудан Грознийга учаётган самолёт қулаб тушди. Қурбонлар сони расман эълон қилинмаган бўлса-да, уларнинг сони 30 кишидан ошмоқда. Мазкур фожиа мамлакатда аввал содир бўлган авиаҳалокатларни ёдга солмоқда. Қуйида 1941 йилдан буён қўшни республикада кузатилган авиаҳалокатлар ҳақида маълумот берамиз.
2024 йил
9 ноябрь куни Ми-8 вертолёти Ақтўбе вилояти Сарижар қишлоғи яқинида ўқув-машғулот парвози пайтида қаттиқ қўнишни амалга оширди. Самолёт бортида уч нафар экипаж аъзоси бўлган, улардан бири ҳалок бўлган, икки нафари касалхонага ётқизилган. Авиаҳалокат сабаби техник носозлик.
25 декабрь Ақтау шаҳрида Бокудан Грознийга учаётган бортида 69 киши бўлган самолёт қулаб тушди. Авиаҳалокатни аниқлаш учун комиссия тузилди, 29 киши омон қолган.
2023 йил
Қозоғистоннинг Қарағанда вилоятида самолёт ўқув парвози вақтида қулаб тушди, икки киши ҳалок бўлди. Ўқув парвози чоғида P2002 русумли UPLА286 самолёти ҳавога кўтарилгандан сўнг алоқага чиқмади.
2022 йил
Қозоғистонда бу йилда фақат битта авиаҳалокат содир бўлган. Февраль ойида санитария рейсини амалга ошираётган самолёт ёниб кетган. Бортда экипажнинг икки аъзоси ва бир шифокор бор эди. Ҳалокат оқибатида қурбонлар қайд этилмаган.
2021 йил
Атиги учта авиаҳалокат содир бўлган. Бортида олти киши бўлган Қозоғистон Миллий хавфсизлик хизмати ҳарбий самолёти ҳалокатга учраган, тўрт киши ҳалок бўлган. Қолган иккита ҳалокат одам ўлимига олиб келмаган ва улар ҳам йўловчи рейсларига алоқадор эмас.
Шу билан бирга, коронавирус инқирозидан кейинги 2020 йилда дунёда йирик тижорат йўловчи самолётлари иштирокида 40 та авиация ҳалокати қайд этилган. Улардан бештаси 299 кишининг ўлими билан якунланган.
Буни ҳали ҳам жуда кам учрайдиган ҳолатлар қаторига киритиш мумкин, чунки ўша йили Халқаро ҳаво транспорти ассоциациясининг ҳисоб-китобларига кўра, дунёдаги ички ва халқаро авиапарвозлар сони 16,4 миллионни ташкил этган.
Қозоғистонда эса 1941 йилдан 2022 йилгача ҳарбий ва қишлоқ хўжалиги самолётлари иштирокида 89 та авиаҳалокат содир бўлган. Бу йилига ўртача битта ҳалокатдир.
Энг кўп ҳалокатлар сони — тўртта бўлиб, фақат бир марта, 1976 йилда кузатилган. 80 йилдан ортиқ вақт давомида Қозоғистон ҳудудида содир бўлган авиаҳалокатларда 804 йўловчи ҳалок бўлган. Статистикага Қозоғистонда 25 декабрь куни юз берган авиаҳалокат қурбонлари сони киритилмаган.
Тижорат самолётларининг фақатгина учта ҳалокати барча ўлимларнинг 43 фоизини ташкил этди. Булар совет йўловчи самолётлари — Ту-134, Ту-104 ва Ту-154 эди.
1980 йилда Ту-154 самолётининг қулаб тушиши Қозоғистон ҳудудидаги энг йирик авиафожиа ҳисобланади. “Аэрофлот” авиакомпаниясининг самолёти Олмаота–Ростов-Дон–Симферопол йўналиши бўйича ички парвозни амалга ошираётганди, бироқ парвоздан 1 дақиқа 40 сония ўтгач, у ерга қулаб тушган ва бутунлай парчаланган. Самолётдаги 166 кишининг барчаси ҳалок бўлган.
Бошқа самолётларга қараганда тез-тез ҳалокатга учрайдиган, аммо доим ҳам қурбонларга олиб келмайдиган моделлар асосан юк ташишга ихтисослашган “Антонов” компанияси томонидан ишлаб чиқарилган. Авариялар сони бўйича Ан-2Р қишлоқ хўжалиги самолёти рекорд ўрнатган. Унинг ҳиссасига 18 та авария ва 26 та ўлим тўғри келган бўлса, рўйхатдаги бошқа самолётлар 10 тадан кам аварияга учраган.
Изоҳ (0)