Қашқадарё вилоятида тез ёрдам ходимлари коронавирус пандемияси даврида касалликка қарши курашган шифокор ва тез ёрдам ҳайдовчиларига рағбат пули тўланмаётганидан шикоят қилмоқда.
«Дарё» мухбири Қарши шаҳар тез тиббий ёрдам станциясининг Вазирлар Маҳкамасининг 2020 йил 20 июлдаги «Коронавирус инфекциясига қарши кураш даврида аҳолини тез тиббий ёрдам хизмати билан кенг қамраб олиш чора-тадбирлари тўғрисида»ги 446-сонли ва 2020 йилнинг 24 сентябрь куни қабул қилинган «Ўзбекистон Республикасида коронавирус инфекцияси тарқалишининг олдини олиш тадбирларига ажратилаётган маблағларнинг самарадорлигини таъминлашга оид қўшимча чора-тадбирлар тўғрисида»ги 583-сонли қарорларида назарда тутилган рағбатлантириш тўловлари тўланмаётганидан норози вакиллари билан суҳбатлашди.
«Биз коронавирус пандемияси даврида касалликка чалинганлар билан ишлаганимиз учун тўлаб берилиши лозим бўлган рағбат пуллари бор эди. Бироқ шу пуллар тўлаб берилмагани сабаб биз ўз маъмуриятимизга, масъулларга мурожаат қилдик. Соғлиқни сақлаш бошқармасидан бу ҳақда топшириқ берилмаган деган жавоб бўлди. Шундан сўнг Президент қабулхонаси, Виртуал қабулхоналар, прокуратура ва бошқа ташкилотларга мурожаат қилдик. Аммо бирорта ташкилотдан тайинли жавоб ололмадик. Вилоят молия бошқармаси бизга бу ҳақда кўрсатма беришмаган, шунинг учун тўлаб берилмайди дея жавоб берди», — дейди Қарши шаҳар тез тиббий ёрдам станцияси шифокори Рамиз Раҳмонов.
Тез ёрдам шифокорларининг айтишича, улар коронавирус билан касалланган беморлар хонадонида бўлиб, уларни тиббий кўрикдан ўтказган. Аҳволи оғир беморларни бошқа шифохоналарга ўтказишда ҳам иштирок этган.
«Биз ҳам COVID-19 бригадаларида беморлар хонадонига бориб, беморлар билан ишладик. Ҳатто оғир аҳволдаги беморларни бошқа шифохоналарга ўтказишда иштирок этдик. Шу сабаб ўзимиз ҳам коронавирус юқтириб олдик. Даволаниб ҳам чиқдик. Биз коронавирус юқтириб олганимиз учун ҳеч қандай пул сўрамаяпмиз, бизга фақат ваъда қилинган олти фоизлик рағбат пуллари тўлаб берилса, бас», — деди шифокор Ҳамза Абилов.
Тез ёрдамнинг яна бир шифокори Абдулла Рашидовнинг маълумот беришича, коронавирусга қарши курашган шифокорларнинг аксарияти касаллик юқтириб олган ва даволанган. Айни пайтда даволанаётганларга эса эътибор йўқ.
«Пандемия даврида кўп маротаба чақирувларга чиқиб, коронавирус юқтирган беморлар билан ишлаб, касаллик ҳам юқтириб олдим. Мендек касаллик юқтириб, ҳозир ҳам даволанаётганлар бор. Аммо уларга эътибор йўқ. Бизга эса ваъда қилинган рағбат пулларини ҳам тўлаб беришмаяпти», — дейди Абдулла Рашидов.
Шифокор Ғайрат Усмонов уларга ваъда қилинган рағбат пули тўққиз ойдан буён тўланмаётганини айтса, тез ёрдам ҳайдовчиси Мусахон Жалолов бошқа вилоятларда ҳамкасбларига ваъда қилинган пуллар тўлаб берилганини айтмоқда.
«Бизга берилиши керак бўлган рағбат пуллари қўлимизга тегмаяпти. Эшитишимиз бўйича, бошқа вилоятларда тез ёрдам ходимларига тўланиши лозим бўлган рағбат пуллари берилган. Буни ўша вилоятдаги ҳамкасбларимиз ҳам тасдиқлашди. Аммо бизда пайсалга солинмоқда. Биз шунинг сабабини билмоқчимиз. Масъуллар бизга рағбат пули тўланиши лозимлигини назарда тутувчи қарорларни ҳам бажармаяпти», — дейди тез ёрдам ҳайдовчиси Мусахон Жалолов.
«Дарё» мухбири билан суҳбатлашган вилоят Соғлиқни сақлаш бошқармаси бош иқтисодчиси Шомурод Боймуродов бундай вазият келиб чиқишига Қарши шаҳар тез тиббий ёрдам станцияси раҳбарияти айбдор эканини, улар ўз вақтида рағбатлантирилиши лозим бўлган ходимлар рўйхатини тақдим этмаганини айтса, Қарши шаҳар тез тиббий ёрдам станцияси бошлиғи Улаш Воҳидов эса «биздан энди рўйхат сўрашди», деди.
«Бундай вазият келиб чиқишига юз фоиз Қарши шаҳар тез тиббий ёрдам станцияси раҳбарияти айбдор. Сабаби улар ўз вақтида рағбатлантирилиши лозим бўлганлар рўйхатини бизга бермаган. Шу сабаб ўша ваъда қилинган рағбат пуллари ҳалигача тўлаб берилмаган. Аммо энди рўйхат тақдим этиляпти ва тез орада тўлаб берилади», — деди Шомурод Боймуродов.
«Биздан энди рўйхат сўрашди. Ва биз эндиликда ўша рўйхатни тузиб, рағбатлантирилиши лозим бўлганлар исм-фамилияси ва ишлаган пайтини кўрсатиб тақдим этяпмиз», — дейди Қарши шаҳар тез тиббий ёрдам станцияси бошлиғи Улаш Воҳидов.
Улаш Воҳидовнинг маълумот беришича, коронавирус пандемияси даврида шаҳар тез тиббий ёрдам станциясидаги мавжуд 21 та бригаданинг 3 таси коронавирус беморларини ташиши режалаштирилган.
«Бироқ шифохоналарга июнь ойида 10 нафар, июль ойида 342 нафар ва август ойида 325 нафар коронавирус билан касалланган бемор олиб борилган бўлса, шунча беморни ўша белгиланган 3 та бригада олиб борди десак, хато қиламиз. Барча бригадалар бемор ташиди. Тўғри, қайсидир бригада балки ой давомида 1 нафар беморни шифохонага етказган бўлиши мумкин. Аммо шу ишда иштирок этди. Биз эндиликда ўша бригада ва неччи нафар бемор етказилганини аниқлаштириб, рўйхат тақдим қиляпмиз. Сабаби қарорда бажарилган иш ҳажмига қараб рағбатлантирилиши лозимлиги қўшимча қилинган», — деди Улаш Воҳидов.
Тез тиббий ёрдам ҳайдовчилари қиш мавсумида ишлаш улар учун қийинчилик туғдираётганини, бригадаларга ажратилган автомобиллар талабга жавоб бермаётганини ҳам айтмоқда.
«Вақтида ‘запчаст’ берилмайди, ‘запчаст’ни худди ўзимизни машинамизга сўраётгандек, ялиниб оламиз. Машина талабга жавоб бермагани сабаб кўчада қолиб кетиш ҳолатларимиз ҳам бўлади. Шахсан ўзим бир йилдан бери бензин насос сўрайман, ололмайман. Қиш масумида автомобилларимизга сифатли мой ва талабга жавоб бермайдиган антифриз солганимиз боис, қийналиб кетяпмиз. Станциядаги ҳожатхонага борсангиз, аҳволига қараб бўлмайди. Умуман қаров йўқ, шарт-шароит йўқ», — дейди ҳайдовчи Асқар Абдуллаев.
«Дарё» мухбири билан суҳбатлашган масъуллар тилга олинган камчиликлар тез орада бартараф этилишини, тез ёрдам ходимларига тўлаб берилиши лозим бўлган рағбат пуллари ҳам яқин кунларда тўланишини ваъда қилди.
Изоҳ (0)