Ўзбек телеекранларида тобора оммалашиб бораётган турк сериаллари нафақат бизда, балки кўплаб хорижий мамлакатларда севиб томоша қилинади. Бугунги кунда Туркия АҚШдан кейинги энг кўп сериал сотувчи иккинчи мамлакатга айланган. Халқаро миқёсда экспорт қилинган турк лойиҳалари орасида шундай сериаллар борки, улар кўп реклама қилинмаган бўлса-да, қизиқарли сюжети ва таъсирли ҳикоялари билан томошабинларни экран қаршисига михлаб қўяди.
“Шам кўтарган ёлғончилар”
Сериалда опа-сингиллардек яқин бўлган тўрт дугона ҳақида ҳикоя қилинади. Эркин ва мустақил Жейда, муваффақиятли психиатр Мелиҳа, оилавий муаммолари бўлган шифокор Шебнем ва ниҳоят, бахтсиз ҳодисада эрини йўқотган кафе эгаси Элиф бош ролларда чиқади. Аёллар Элифга ҳаётда ўз ўрнини топишга ва қизи Тернга муносиб ҳаёт кечиришга ҳаракат қилиб, қайғусини енгишга ёрдам беради. Терннинг мактабдаги дугонасининг отаси Якуп билан учрашув Элифнинг ҳаётини тубдан ўзгартириб юборади.
“Никоҳ ҳақида барча ҳақиқатлар”
Тўрт опа-сингил Чўлпан, Азра, Гунеш ва Санем Истанбулга кўчиб ўтади ва юридик соҳада карьера қилади. Уларнинг барчаси ажрим жараёнлари билан шуғулланади. Қизларнинг ҳар бирининг шахсий ҳаёти турлича ривожланади. Чўлпан эридан ажрашган, Санем никоҳга умуман ишонмайди, Азра бахтли турмуш қурган, Гунеш эса севган инсонига турмушга чиқиш ҳаракатида. Бир куни опа-сингилларнинг ҳаётида кутилмаган воқеа содир бўлади: уларнинг отаси кўп йиллар олдин бошқа аёлни деб қизларнинг онасини ташлаб кетганди. Шунда қаҳрамонлар олдида ўз отасини кечириш ёки кечирмаслик танлови туради.
“Янги ҳаёт”
Ҳарбий соҳада хизмат қилган капитан Адем нафақага чиқади. У хавфли ҳаёт тарзида яшашга одатлангани боис эндиликда тинч ҳаётда ўз ўрнини топишга ҳаракат қилади. Аммо, оиласини боқиш учун иш топиши ҳам керак бўлади. Адем бой ва нуфузли Темурнинг хотинига тансоқчи бўлиб ишга киради. Аввалига у ёш ва гўзал Ёсамин билан келишолмайди. Қиз ҳатто Адемни ишдан бўшатмоқчи бўлади. Аммо қаттиққўл эркак ва жозибали аёл ўртасида кутилмаган ишлар содир бўлади.
“Шиша ортидаги қиз”
Седат Кўрўғли – Туркиядаги энг йирик меҳмонхоналар тармоғига эгалик қилувчи бадавлат оиланинг эрка меросхўри. Унинг турмуш қурган аёл билан ишқий муносабати отаси Рафетни ғазаблантиради ва ўғлини зудлик билан уйлантиришга қарор қилади. Келин ҳам тезда топилади: у янги меҳмонхона лойиҳаси устида ишлаётган архитектор Налан бўлади. Бекам-у кўстликда ўсган беғам йигит ва ҳалол ҳамда тартибли қиз тўйга ҳозирлик кўради. Аммо уларнинг бахтига ўтмиш сирлари тўсқинлик қилади.
“Шунчаки дўстлар”
Карьера қуришга муккасидан кетган Эже ва келишган йигит Умут кўп йиллардан буён бир-бирини яхши билади. Улар ўзларини ҳам, атрофдагиларни ҳам ўрталарида ҳеч қандай романтика йўқлигига ишонтиради. Улар Умутнинг консерватив холасига тегишли, Босфорга қараган ҳашаматли уйда бирга яшаш учун ўзларини келин-куёв қилиб кўрсатишади. Бироқ бадавлат қариндош тез орада нима бўлаётганини тушунади ва шарт қўяди: у уйини ким биринчи қонуний никоҳдан ўца, ўшанга қолдиришга қарор қилади. Эже ва Умут чинакам муҳаббатни топиш учун узоққа бориш шарт эмаслигини тан олмай, ўзларига турмуш ўртоқ излай бошлайди.
“Сендан гўзалроқ”
Эфсун кекса отаси билан Газиантеп номли кичик шаҳардаги фермада яшайди. Қиз онасини 12 ёшидан бери кўрмай келгани учун уни топишга ҳам уринмайди. Эфсун истеъдодли шифокор бўлишига қарамай, пойтахтга ишга кетмайди ва ўзи туғилиб ўсган шаҳарчасидаги маҳаллий аҳолига ёрдам бериш учун кичик касалхонада ишлай бошлайди. Кунларнинг бирида унинг олдига Эмир исмли киши келади. У Эфсуннинг онасига ҳайдовчи эканлигини айтиб, онаси ўлим ёқасида эканини билдиради ва қиздан зудлик билан Истанбулга боришини сўрайди. Эфсун истамайгина бунга рози бўлади ва пойтахтга кетади, аммо не кўз билан кўрсинки, уни алдаган бўлишади. Эсфуннинг онаси пластик жарроҳлик клиникасида бош шифокор бўлиб ишлайди. У касал эмас, шунчаки қўлида муаммолари бўлади. Она даволаниб олгунга қадар клиникани бошқариб туришни қизига топширади. Иложсиз қолган Афсун Истанбулда қолади. Бир оз вақт ўтгач, ўзини ҳайдовчи софатида таништирган Эмир ҳам аслида тажрибали жарроҳ эканини билиб қолади. Бир-бирини ёқтирмаслигига қарамай, эндиликда улар бир клиникада ишлашига тўғри келади.
“Қоғоз уй”
Жиҳан жиноят ҳуқуқи ўқитувчиси, Айлин муваффақиятли адвокат, уларнинг учта ажойиб фарзанди бор: ўғли Мерт ва қизлари Жемре ва Мелиса. Қаҳрамонларнинг ҳаёти даҳшатли оқшомларнинг бирида, Жиҳан ва Эйлин ўз уйида аёл жасадини топгач, бутунлай ўзгаради. Жабрланувчи Жиҳаннинг севгилиси, қотил эса 16 ёшли Жемре бўлиб чиқади. Қизи қамалмаслиги учун эр-хотин жасадни боғга яширишга ва содир бўлган воқеа ҳақида сукут сақлашга қарор қилишади. Аммо кўп сирлар фош бўлади ва идеал оила қиёфаси қоғоз уй каби мўрт бўлиб чиқади.
Изоҳ (0)