“Тез ёрдам машинаси 5 йилда икки бараварга кўпайди, битта чақирув дориси 640 сўмдан 7,5 минг сўмга ошди”. “Дарё” тиббиётдаги ўзгаришларни Наманган вилояти мисолида ўрганди

Президентнинг 2022 йил июндаги қарори билан Республика тез тиббий ёрдам маркази ва унинг ҳудудий филиаллари қайта ташкил этилди. “Дарё” мухбири Азизбек Абдувалиев мазкур соҳадаги ўзгаришларни Наманган вилояти мисолида ўрганди.

“Узоқроқ жойга борсак, қайтишга бензин тополмаган кунларимиз бўлган”

Республика тез тиббий ёрдам маркази Наманган вилоят филиали директори Адҳамжон Ирисбоевнинг билдиришича, ушбу қарордан сўнг вилоятда фаолият кўрсатиб келаётган барча тез тиббий ёрдам бўлими, шохобча ва пунктлар ҳамда автохўжаликлар ягона вертикал бошқарув тизимига айлантирилган. Бу эса тизимда иш юритишни қулай ва самарали бўлиши учун хизмат қилмоқда.

Филиалда бугунги кунда 6,5 мингга яқин ходим фаолият кўрсатмоқда. Улардан 1,2 минг нафардан кўпроғини шифокорлар, 3,5 мингдан ортиғини эса ўрта тиббиёт ходимлари ташкил этади. Ҳайдовчиларнинг ўзи 1,3 минг нафардан ошиқ.

Биласиз, бизнинг тизимда автомобилларнинг сони ва сифати ҳал қилувчи аҳамиятга эга. Куни-кеча Жиззахда ишлаб чиқарилган 10 та Volkswagen Caddy автомобилини олдик. Февраль ойида яна 6 та шундай машина беришмоқчи. Шу тариқа эскирган 70 та машинамизни босқичма-босқич янги, замонавийларига алмаштирамиз. Бу жараён 2025 йилгача якунига етиши режалаштирилган. Ҳозир автохўжалигимизда жами 229 та автомобилимиз бор. Ишониш қийин, лекин 2017 йилда Наманган шаҳри тез тиббий ёрдам бўлимида бор-йўғи 29 та бригада ва шунча машина бўлган. Ҳозир уларнинг сони 52 тага етди. Бундан беш йил аввал битта чақирув учун дори-дармонга ажратилган пул 640 сўм бўлган, бугунги кунда 7,5 минг сўм. Олдинлари бригадаларимиз узоқроқ жойга борса, қайтишга бензин тополмаган кунлари бўлган. Худога шукр, бугун дори-дармонда ҳам, ёқилғида ҳам муаммо қолмади, барчаси ҳал этиб берилган. Транспорт воситаларимиз GPS тизимига уланган, яқин орада радиолоқа ва планшетлар билан ҳам таъминланади. Тез ёрдамдаги бу ўзгаришларни олдин фақат орзу қилардик”, — дейди Адҳамжон Irisбоев.

“Ҳар бир бригада иш бошлашидан аввал беморларга узоқ умр ва мустаҳкам соғлиқ тилаб, сўнг йўлга чиқади”

“Дарё” ижодий гуруҳи тез тиббий ёрдам бригадаси билан биргаликда тунги чақирув манзилига борди. Мактабнинг иккинчи синфида таҳсил олаётган ўқувчи қизни кучли оғриқ безовта қилаётган эди. Врач-реаниматолог Шукуржон Эркинов беморни кўздан кечиргач, уни зудлик билан шошилинч тез ёрдам илмий марказига олиб кетишга қарор қилди.

Машинага унинг онаси ҳам чиқди. У ва ҳамшира Мунаввар Дўсматова то шифохонага етиб боргунча оғриқ ва қўрқувдан безовталанаётган қизни тинчлантириб кетди.

Бундай ҳолатларда психолог ҳам бўлишга тўғри келади. Чунки беморга нафақат дори-дармон, балки ширин сўз ҳам озуқа бўлади. Айниқса, болалар учун, — дейди Мунаввар Дўсматова.

Бемор саноқли дақиқаларда касалхонага етказилди ва шифокорларга топширилди. Шундан сўнг тез ёрдам бригадаси енгил тин олиб, кейинги манзил сари йўл олди.

Врач-реаниматолог Шукуржон Эркинов 35 йиллик тажрибага эга, тез ёрдам тизимида ишлаётганига эса 15 йилдан ошган.

Ўзининг айтишича, махсус реанимобилда беморни эсон-омон шифохонагача етказиб борса, худди фарзанд кўргандек суюнади. Чунки беморликнинг оғир машаққатлари ўзининг ҳам бошидан ўтган.

Бундан икки йил аввал ўзим ҳам СOVID-19 билан қаттиқ оғриб қолдим. Жар ёқасидан қайтдим десам ҳам бўлади. Шунда тирикликнинг нечоғли улуғ неъмат эканлигини ўзим ҳам яна бир бор ҳис этдим. Ишонинг, биздаги ҳар бир бригада иш бошлашидан аввал навбатчилиги давомидаги беморларга узоқ умр ва мустаҳкам соғлиқ тилаб, сўнг йўлга чиқади, — дейди шифокор.

“Телефон орқали тиббий маслаҳат берган пайтларимиз ҳам кўп бўлади”

Республика тез тиббий ёрдам маркази Наманган вилоят филиалига 2022 йил давомида 1,2 миллиондан ошиқ чақирув келиб тушган. Уларни филиал Call-маркази ходимлари қабул қилиб олган. Вилоятда 240 нафар ходим навбатчилик кунлари сутка давомида ўртача 150-180 та чақирув қабул қилади.

Чақирувлар қиш ва жазирама ёз мавсумида кўпроқ бўлади. Энг тиғиз пайт эса кечки маҳалга тўғри келади. Биз билан боғланаётганларнинг аксарияти сурункали касаллиги бор беморлар. Уларнинг аксариятига телефон орқали ҳам керакли тавсияларни берамиз, чунки орамизда малакали тиббиёт ходимлари кўп, — дейди марказ диспетчери Моҳигул Асқарова.

Моҳигул Асқарованинг айтишича, марказ фаолиятида ёлғон ёки натижасиз чақирувлар ҳам кам эмас. Ўтган йили уларнинг сони қарийб 10 мингтани ташкил этган.

Шунингдек, қўнғироқ қилиш давомида дашном ва ҳақоратларга ҳам дуч келамиз. Лекин бемор ва унинг яқинларини асабий ҳолатини тушуниб, сабр қиламиз ва тинчлантирамиз. Фаолиятимиздаги бундай салбий жиҳатлар бошқа беморларнинг бригада бориб келганидан сўнг ёки байрам кунларидаги миннатдорлик сўзлари билан ёддан кўтарилиб кетади, — дейди Моҳигул.

Маълумот учун, Республика тез тиббий ёрдам маркази Наманган вилоят филиали яқин кунларда яна бир алоҳида бинога эга бўлиши кўзда тутилмоқда. Ушбу бино реконструкцияси учун маблағ жорий йил биринчи чораги давомида молиялаштирилиши режалаштирилган.