“Касаллар, қийналган одамлар орқасидан ноинсофлик қилиб пул топадиган шифокорни ҳам, дорихонани ҳам боридан йўғи яхши” — Сурхондарё вилояти ҳокими

Сурхондарё вилояти ҳокими Улуғбек Қосимов беморларга кераксиз дориларни ёзиб, дорихоналарга йўналтириш, шундан пул ишлашни касб қилган ноинсоф шифокорларимиз борлигини айтиб, аҳолини бепул, сифатли ва кафолатланган тиббий хизматдан фойдаланиш ҳуқуқини таъминлаш учун барча чоралар кўрилишини маълум қилди. Бу ҳақда Сурхондарё вилояти ҳокимлиги ахборот хизмати маълум қилди.

Ҳайронман, нафси ҳакалак отган шифокорлар, тиббиёт бирлашмаларида ишлаётганлар, дорихонадагилар, президент топшириқ берганидан кейин ҳам халқни алдашдан умуман тап тортмаяпди. Ундан кўра, даволаб, касални тузатиб жуда оч қолиб кетган бўлсанг, пулинг етмаётган бўлса ёрдам сўрагин. Нима қиласан бўлмайдиган дорини ичириб, бечорани қийнаб, бир жойини даволаб, иккинчи жойини касал қилиб?

Шунча болалар нобуд бўлгани ҳаммани кайфиятига таъсир қилди. Яна булар ҳеч нарсадан тап тортмайди.

Туман ҳокимларга юз марта айтдим: бирортанг шуғулланмайсан, томошабинсан. Президентимиз топшириқ берди, вазият мана шундай эканини билдинг, нимага ҳамманг бориб қаттиқ шуғулланмайсан?, — деди Улуғбек Қосимов.

Унинг алоҳида таъкидлашича, айтилган дорихонадан эмас, бошқа жойдан дори олиб келганларнинг ҳаммасини қайтариш билан шуғулланадиган шифокорлар бор.

“Фақат айтган дорихонасидан олиб келмаса, беморга ҳам қарамайди, уколини ҳам қилмайдиган шифокорлар ҳақида айтишяпти. Айтилган дорихонадан касаллар бориб дори олар экан, кейин шифокор касалдан ортиқча олиб қолинган пулни дорихонадан қайтиб олиб келаркан. Шу пул юқадими?

Қайси шифокор дорихона билан келишиб ишлаётгани, шифохоналарда охирги бир ойда даволаниб кетган ҳамма беморларнинг тарихи кўтарилиб, ўрганилади. Кўрсатув тайёрлаб, бутун халққа кўрсатамиз.

Туғуруқхона шифокори беморни жарроҳлик амалиёти билан беморни фарзандини дунёга келтиргани учун харажатлар учун 1 миллион 800 минг сўм талаб қилган. Бемор “нақд пулим йўқ” деса шифокор пластик банк картасига тушириб олибди. Бундайлар шифокор дейишга нолойиқ.

Яна бир ҳолатда шифокор келган беморларнинг 100 фоизини кесарча кесиш усулида жарроҳлик ўтказиб, улардан 2,5—3 миллион сўмдан олар экан. Ҳар дақиқада дорихона билан телефонлашиб, мана бу кераксиз дориларни ёзиб юбордим, деб айтар экан.

Касаллардан, қийналган одамларнинг орқасидан шу тарзда пул қилиб, ноинсофлик қилиб халқни қийнайдиган бўлса, бундай шифокорни ҳам, дорихонанинг ҳам боридан йўғи яхши. Бундайлар катта тизимга иснод келтиради. Қайси шифокор тўғри ишласа ойлиги етмайди, қайси бири қийланиб қолган, борми шундайлар?, — деди вилоят раҳбари.

Ҳокимнинг қўшимча қилишича, ҳозирги кунда дорихонага чиқишга ҳожат ҳам йўқ. Боиси биринчи навбатда ишлатиладиган 85 фоиз дори шифохоналарда бор.

Жонлантириш бўлимида, туғуруқ вақтида ишлатиладиган ҳамма дорилар шифохонада мавжуд. Шифокорлар касалга “чиқиб дори олиб кел” дейишга ҳам ҳаққи йўқ. Мана бизга қандай аҳволга келиб қолганмиз, — деди Улуғбек Қосимов.