Соғлиқни сақлаш вазирлигининг маълум қилишича, хусусий тиббиёт ташкилотлари 2023 йилда 2017 йилга нисбатан 2,7 баробарга кўпайиб, уларнинг сони 3 минг 200 тадан 8 минг 560 тага етган.
Қўшимча қилинишича, хусусий тиббиёт ташкилотларида 2017 йилда 50 турдаги ихтисослик бўйича хизмат кўрсатилган бўлса, 2022 йилда эса 126 турдаги ихтисослик бўйича тиббий хизмат кўрсатиш йўлга қўйилган.
Хусусий тиббиёт муассасасини очиш учун яратилган шароитлар ва бу бемор ҳамда маҳаллий шифокор кадрлар учун қандай имкониятлар бериши ҳақида “Дарё” мухбири “Кўз нури” клиникалар тармоғи бош шифокори Ҳикматулло Содиқов билан суҳбатлашди.
Ютуғимиз – шу соҳа эгасимиз
Биз кўз касалликларини даволаш йўналишида ишлаймиз. Ўзим кўз шифокориман – кўз касалликлари бўйича жарроҳлик амалиётларини ўтказаман. Самарқанддаги давлат тиббиёт муассасасида тўрт йил ишлаганман. Ундан кейин тўққиз йил хусусий тиббиёт клиникасида оддий шифокор сифатида ишладим. Шу вақт мобайнида барча шифокорлар сингари ўзимни ҳам шахсий клиникам бўлишини ният қилиб юрардим.
Бир неча йиллар аввал “Кўз нури” клиникасига асос солдик. Албатта, клиника очиб, уни йўлга солиш учун анча вақт ва маблағ, меҳнат ресурси керак бўлади. Бунда бизнинг ютуғимиз — 10 йилдан ортиқ мана шу йўналиш бўйича иш тажрибасига эга бўлганим, кўз касалликлари бўйича ички муаммоларни билишим шифохонамизнинг тезроқ юриб кетишига имкон берди.
Айни вақтда клиникамизнинг Тошкент шаҳрида 1 та, Самарқанд вилоятида 2 та ва Қашқадарё вилоятида битта филиали фаолият юритмоқда. Бундан ташқари, бошқа вилоятларга ҳам бориб, тиббий кўриклар ва операциялар ўтказиб турамиз. Шифохоналаримизда юздан ортиқ ходимлар хизмат кўрсатмоқда.
Ортиқча текширувлар йўқ
Бир нарсани тан олиб айтиш керак, ҳақиқатан ҳам президентимиз тадбиркорларга катта эътибор қаратяптилар. Қайсидир ишни қилишга кўзингиз етса, тўғри ташкил қилиб ва қонуний ишласангиз, исталган йўналишда йўллар очиб қўйилган.
Биз келгусида нафақат юртимиз, балки қўшни республикаларда ҳам ўз филиалларимизни очмоқчимиз. Бу бўйича ишларни бошлаганмиз, яъни ўша мамлакатлар бозорини ўрганяпмиз. Уларда бизчалик тадбиркорларга йўл очиқ эмаслигига гувоҳ бўлдик. Масалан, бизда ҳужжатларни тўғри шакллантириб борсангиз на лицензиялашда, на бошқа тартибларда муаммо бўлмайди. Ҳеч кимга илтимос қилишингиз ё бировга пул беришингиз шарт эмас.
Авваллари ҳақиқатан ҳам муаммолар кўп бўларди. Айниқса, ортиқча текширувлар ҳам вақтингизни оларди, ҳам ишга халал берарди. Ҳозир 5 йилда бир маротаба тўлиқ текширувдан ўтасиз. Унгача агар қонунчилик талабларини бузмасдан ишласангиз, солиқ органлари ҳам, Соғлиқни сақлаш вазирлиги ёки бошқа текширув органлари безовта қилмайди.
Ҳамма учун фойдали
Табиийки, бозорда қанча кўп таклиф бўлса, нархларни ўз-ўзидан тушишига олиб келади. Масалан, қўшни мамлакатлар билан солиштирганда бизнинг йўналишда хизмат кўрсатиш нархи анча арзон. Бу одамларнинг пули камлигидан эмас, балки хусусий клиникаларнинг кўплигидан, рақобат борлигидан далолат беради. Айтайлик, биз қилаётган баъзи операциялар қўни мамлакатларда икки-уч баравар қиммат туради. Шунинг учун улардан бизга келиб даволанувчилар кўп.
Хусусий клиникаларнинг кўп бўлиши шифокорлар иш билан таъминлайди. Бундан ташқари, Ўзбекистонда тажрибали кадрларнинг қолишига ҳам ёрдам бермоқда. Боиси авваллари кўпчилик тажрибали шифокорларнинг чет мамлакатларга кетиши кўп кузатилар эди. Масалан, Африка мамлакатларига, Россия ва Яманга кетиб қолишарди. Эндиликда ўзимиз чет элдан тажрибали шифокорларни чақиртириб ишлатяпмиз.
Яна бир жиҳати, ноёб ускуналарнинг ўзимизда бўлиши беморларни чет элга бориб даволанишига ҳожат қолдирмайди. Шу боис офталмологик касалликлар бўйича беморларни бошқа давлатга бориб даволаниш каррасига камайди.
Бозор катта
Ҳозир қайси клиникага борсангиз, беморлар навбатда турганига гувоҳ бўласиз. Бу бозорда талаб борлигидан далолат беради. Демак, тиббиёт йўналишида иш бошламоқчи бўлган тадбиркорлар қўрқмасдан иш бошласа бўлади. Яхши жамоа — малакали мутахассислар, тажрибали иш юритувчилар жамланса кифоя, бошқа тарафдан эса ҳамма шароитлар етарли.
Маълумот учун, хусусий тиббиётни қўллаб-қувватлаш тизими йўлга қўйилди. Мисол учун, бугунги кунда нодавлат тиббиёт ташкилотлари томонидан 2025 йил 1 январга қадар қатор имтиёзлар берилган. Жумладан:
- ўз эҳтиёжлари учун республика ҳудудига олиб кириладиган янги тез тиббий ёрдам автомобиллари импорт божхона божидан озод қилинган;
- олиб келинадиган янги тиббий асбоб–ускуналар, бутловчи буюмлар ва уларнинг эҳтиёт қисмлари ҳамда сарфлаш материаллари учун божхона имтиёзлари мавжуд;
- сарфлаш материалларини Ўзбекистон Республикаси ҳудудига олиб киришда қўшилган қиймат солиғидан озод қилинди;
- хусусий тиббиёт муассасалари барча солиқ тўловларидан озод қилинган.
Изоҳ (0)