ГСМА М360 Евросиё форумида ZTE компаниясининг катта вице-президенти Жеймс Чжан сунъий интеллектнинг рақамли иқтисодиёт ривожи учун ҳал қилувчи ўрнини очиб берди. У ўз нутқида компаниянинг сунъий интеллект технологияларини ўз экотизимига чуқур интеграция қилиш стратегиясини батафсил тушунтириб, бу технологик имкониятлар ва маҳсулотлар самарадорлигини сезиларли даражада оширишга хизмат қилаётганини таъкидлади.
ZTE Ўзбекистоннинг етакчи телеком-операторлари билан 5G тармоқларини қуриш ва мамлакатни рақамли трансформация қилиш соҳаларида узоқ муддатли стратегик ҳамкорликни давом эттирмоқда. “Рақамли Ўзбекистон 2030” дастурини қўллаб-қувватлаш мақсадида компания чекка ва бориш қийин бўлган ҳудудларда мобил алоқа тармоқларини кенгайтириш лойиҳаларини амалга ошириб, мамлакатимиз аҳолиси учун рақамли хизматлардан фойдаланиш имкониятларини янада кенгайтирмоқда.
2025 йилнинг 21–22 май кунлари Тошкентда Ўзбекистон Республикаси Рақамли технологиялар вазирлиги ва VEON кўмагида ГСМА М360 Евросиё форуми бўлиб ўтмоқда. Тадбир ахборот технологиялари ва телекоммуникация соҳасидаги етакчи компанияларни бирлаштириб, минтақада рақамли трансформацияни жадаллаштириш учун зарур бўлган ташаббуслар, инвестициялар ва ҳамкорликларни муҳокама қилиш майдонига айланди. Форум доирасида сунъий интеллект, 5G ва бошқа илғор мобил технологияларни жорий этиш, малакали кадрлар тайёрлаш ҳамда шу каби чоралар иқтисодий ўсиш ва барқарорликни таъминлашга хизмат қилиши таҳлил қилинди. Тадбир ҳамкорларидан бири ахборот-коммуникация технологиялари соҳасидаги етакчи глобал ускуналар ва интеграциялашган технологик ечимлар етказиб берувчиси ZTE Corporation бўлиб, у сунъий интеллект рақамли иқтисодиётни қандай тезлаштириши ва трансформация қилиши мисоллар кўринишида очиб берди.
Сунъий интеллект – ривожланишнинг двигатели сифатида
Сунъий интеллектга асосланган замонавий интеллектуал иқтисодиёт шиддат билан ривожланмоқда. IDC халқаро тадқиқот компанияси прогнозига кўра, сунъий интеллект 2030 йилга келиб глобал ЙAIМни 3,5 фоизга ошириши ва ишлаб чиқариш, турмуш ва бизнес моделлари тубдан ўзгаришига туртки бўлиши мумкин. ГСМА М360 Евросиё форумида ZTE Corporation катта вице-президенти Жеймс Чжан сунъий интеллект асосидаги инновациялар ҳақида сўзлар экан, интеллектуал иқтисодиётдаги тафовутларни бартараф этиш учун 5и концепсиясини таклиф этди.
У интеллектуал иқтисодиётни уч устунга (рақамли инфратузилмани яратиш; янги интеллектуал бизнес-моделларни қўллаб-қувватлаш; инсон манфаатларига йўналтирилган, ахлоқий сунъий интеллект кенг жорий этилишини таъминлаш) таянган ҳолда ривожлантириш режасини тақдим этди. “Сунъий интеллект — шунчаки технология эмас, балки иқтисодий ўсиш ва инклюзив ривожланиш катализаторидир”, — дейди Жеймс Чжан. “5и стратегияси орқали биз турли тармоқлар учун янги қиймат парадигмаларини шакллантиряпмиз. ZTE СИънинг илғор имкониятларини РАН тармоқлари ва интеллектуал ҳисоблаш инфратузилмасидан тортиб, ақлли ишлаб чиқариш ҳамда кейинги авлод қурилмаларигача бутун экотизимимизга татбиқ этди”.
Евросиё минтақасида 5G ва сунъий интеллект интеграциясини жадаллаштириш
Бешинчи авлод алоқа технологияларини жорий этилиши нуқтайи назаридан, рақамли иқтисодиёт Евросиё минтақасида улкан салоҳиятга эга. 2024 йилда дунёдаги 5G уланишлар улуши 25 фоизга етиши кутилган бўлса-да, Евросиёда бу кўрсаткич бор-йўғи 1 фоизни ташкил қилди. 2030 йилгача минтақада 5G уланишларини 41 фоизга етказиш учун ҳали катта ишларни амалга ошириш керак. 5G ва СИ интеграцияси маълумот узатиш кечикишини камайтиради, маълумотларни қайта ишлаш самарадорлигини оширади ва СИ иловалари нархларини пасайтиради. Бу нафақат нейротармоқ ва фойдаланувчи ўртасида янада мослашувчан ўзаро алоқани таъминлайди, балки СИ имкониятларидан фойдаланган ҳолда, аниқ бизнес сценарийларига мос 5G тармоғи самарадорлигини оптималлаштиришга ёрдам беради.
“ZTE сўнгги йилларда Евросиё мамлакатларидаги энг йирик операторлар билан узоқ муддатли стратегик ҳамкорликни мустаҳкамлаб келмоқда. Компания сунъий интеллект инновацияларига таянган ҳолда, бутун минтақада мобил иқтисодиёт ривожини рағбатлантириш, юқори унум ва иқтисодий самарадорликка эга 5G комплекс маҳсулот ҳамда хизматларини тақдим этиш, янги рақамли инфратузилма барпо этиш ва турли тармоқларни рақамли трансформация қилишда давлатларга кўмаклашишда давом этади”, — дея таъкидлади Жеймс Чжан.
Евросиё мамлакатлари рақамлаштиришни ижтимоий-иқтисодий ривожланишнинг самарали драйвери сифатида қабул қилиб, глобал тенденцияга қатъий амал қилмоқда. Ўзбекистонда эса рақамлаштириш бир неча йилдан бери кенг полосали алоқани кенгайтириш, интернет тезлигини ошириш ва мобил алоқа билан тўлиқ қамровга эришиш орқали мамлакатни минтақавий ахборот технологиялари марказига айлантиришга қаратилган ислоҳотлар дастурининг асосий йўналишида турибди. ZTE ушбу мақсадларни қўллаб-қувватлаб, уларни амалга оширишда фаол иштирок этмоқда: компания барча йирик алоқа операторлари билан, жумладан 5G тармоғини қуриш ва мамлакатни рақамли трансформация қилиш соҳаларида яқин ҳамкорлик қилади.
ZTE “Рақамли Ўзбекистон 2030” концепсиясини татбиқ этиш, республиканинг энг олис ва йирик инфратузилмасиз ҳудудларида мобил тармоқларни кенгайтириш ҳамда аҳолига замонавий рақамли хизматларни тақдим этиш лойиҳаларини амалга оширмоқда. Компания, шунингдек, ахборот-коммуникация технологиялари йўналишидаги етук ёш мутахассисларни тайёрлашга алоҳида эътибор бериб, Ўзбекистоннинг етакчи соҳа университетлари билан ҳамкорлик қилмоқда.
“Бизнингча, Евросиёнинг рақамли иқтисодиёти келажаги инклюзив инновациялардадир”, — дея хулоса қилди Жеймс Чжан. “Стратегик ҳамкорликлар, сунъий интеллектга асосланган ечимлар ва маҳаллий ҳамкорлар орқали ZTE минтақада мутлақо янги узвийлик ва самарадорлик даражасини таъминлайдиган инфратузилмани шакллантиришга ёрдам бермоқда. Мобил тармоқларга киритиладиган инвестициялар оддий статистика эмас, балки ўзаро чамбарчас, интеллектуал ва тенг имкониятли жамият қуриш пойдеворидир. Биз барча ҳамкорларни ушбу келажакни биргаликда яратишга чорлаймиз”.
Реклама ҳуқуқи асосида
Изоҳ (0)