“Реал Мадрид” билан шартномасини узайтирмаган Лука Модрич фаолиятини АҚШда давом эттириши мумкин. Mundo Deportivo нашри хабарига кўра, 39 ёшли ярим ҳимоячи Лионель Месси тўп сураётган “Интер Майами” жамоаси билан бир йиллик шартнома имзолаш арафасида турибди.
Маълумотларга кўра, “Интер Майами” аллақачон Модрич билан музокараларни бошлаб юборган. Футболчи эркин агент сифатида жамоага қўшилади, чунки унинг “Реал” билан амалдаги шартномаси 30 июнь куни якунланади. Таклиф қилинаётган келишув 2026 йил июлигача мўлжалланган бўлиб, бу хорватиялик футболчига миллий терма жамоа билан Жаҳон чемпионатига бориш имконини беради. Йиллик маош миқдори 2,5 миллион доллар атрофида бўлади. Шунингдек, Лука “Интер Майами”да “Барселона” собиқ футболчилари — Лионель Месси, Луис Суарес, Серхио Бускетс ҳамда Жорди Альба билан биргаликда ўйнаши кўплаб мухлисларда қизиқиш уйғотмоқда.
Маълумот учун, Модрич жорий мавсум Карло Анчелотти бошчилигидаги “Реал” сафида камроқ ўйин амалиётига эга бўлди. У Ла Лига доирасидаги 34 учрашувда майдонга тушиб, ўз ҳисобига 2 гол ва 6 та голли узатма ёздириб қўйган.
Изоҳ (0)