Бугунги кунда халқаро туризм, минтақалараро ҳамкорлик ва ҳаво алоқаларини ривожлантириш ҳар қачонгидан ҳам долзарб. Ана шундай шароитда, Ўзбекистон миллий авиакомпанияси Uzbekistan Airways томонидан илк бор ташкил этилган “Марказий Осиё – Uzbekistan Airways қанотларида” форуми нафақат икки мамлакат — Ўзбекистон ва Россия ўртасидаги алоқаларни мустаҳкамлашга, балки бутун Марказий Осиёнинг глобал сайёҳлик харитасидаги нуфузини оширишга хизмат қилди.
Ушбу форум — Ўзбекистоннинг халқаро туризм ва транспорт салоҳиятини намоён этувчи муҳим платформа, йирик бизнес вакиллари, туризм мутахассислари ҳамда оммавий ахборот воситалари учун стратегик мулоқот майдонига айланди.
Форум давомида Uzbekistan Airways ўзининг халқаро йўналишларини кенгайтириш, Тошкентни минтақа транзит хаби сифатида ривожлантириш ва йўловчилар учун янада қулай шарт-шароитлар яратиш режаларини тақдим қилди. Махсус тақдимот — “Марказий Осиё – Uzbekistan Airways қанотларида” доирасида авиакомпания ўз олдига қўйган мақсадлар, янгиланган рейслар жадвали ва сервис стандартлари ҳақида маълумот берди.
Шухрат Ядгаров, Uzbekistan Airways бошқаруви раисининг ўринбосари:
— Ўзбекистон бой тарихий меросга эга, меҳмонхона соҳаси изчил ривожланмоқда, шунингдек, фаол туризм, тиббий туризм каби йўналишлар ҳам кенгайиб бормоқда.
Бугунги кунда “Uzbekistan Airways” АЖ ва РВС орқали ҳафтасига 135 дан ортиқ парвозларни амалга оширамиз. Шу имкониятдан фойдаланиб, форум шаклида бизнинг хизматларимизни намойиш этишни, Россиядаги сайёҳлик соҳасининг эътиборини жалб қилишни мақсад қилганмиз. Мақсадимиз – ушбу глобал рақобатда ўз ўрнимизни мустаҳкамлаб, россиялик сайёҳларнинг эътиборини Ўзбекистонга қаратишдир.
Биз форум орқали нафақат хизматларимизни таништирдик, балки сайёҳлар учун янги имкониятлар, ҳамкорлик истиқболлари ва туризм салоҳиятимизни кўрсатиб ўтдик. Умид қиламизки, бу тадбир Россия бозорида бизнинг позициямизни мустаҳкамлашга хизмат қилади.
Тадбирда Ўзбекистоннинг сайёҳлик салоҳиятини намоён этувчи расмий видеоролик намойиш этилди. Форум иштирокчилари юртимизнинг бой тарихи, маданий мероси, замонавий инфратузилмаси ва сервис соҳасидаги ютуқлари билан яқиндан танишдилар.
Форум доирасида ташкил этилган B2B сессияларда Ўзбекистон ва Россиянинг етакчи туроператорлари ўзаро тажриба алмашиб, янги лойиҳалар ва турпакетлар яратиш, авиация хизматларини бозор эҳтиёжларига мослаштириш борасида самарали мулоқотлар олиб борди.
“Ўзбекистон билан ҳамкорликни кенгайтириш, бизнес алоқаларни мустаҳкамлаш – бу бизнинг стратегик мақсадларимиздан биридир”, — дейди “Араку” компанияси вакили Денис Матюхин.
— Биз узоқ йиллардан бери MICE (корпоратив тадбирлар ва хизмат сафарлари) соҳасида ишлаймиз, ва бугунги кунда бу йўналишнинг фаол ривожланаётганини кўриб жуда хурсандмиз. Бу бизнинг компаниямиз тўғри йўналишда ҳаракат қилаётганининг яна бир тасдиғидир. Эндиликда биз компанияда янги йўналиш – Ўзбекистон билан янада чуқурроқ ҳамкорлик йўлга қўймоқчимиз.
Бундан ташқари, биз форумда Ўзбекистон ҳаво йўллари вакиллари билан бир қатор ташаббуслар ҳақида суҳбатлашдик. Менинг фикримча, Ўзбекистон ҳаво йўллари бугунги кунда бозор ўзгаришларига, шу жумладан сиёсий вазиятларга тез ва мослашувчан тарзда жавоб бера оладиган энг динамик компаниялардан бири бўлиб бормоқда.
Агар биз илгари сураётган ташаббуслар ўз аксини топса, бу барча томонлар учун фойдали бўлади: авиакомпания қўшимча йўловчи оқимини олади, мижозлар эса қулай шарт-шароит ва юқори даражадаги хизматдан баҳраманд бўлади.
Форумнинг расмий қисмида нафақат тақдимотлар, балки маданий дастур, ўзбек миллий таомлари дегустацияси, жонли мусиқа ва эсдалик совғалар ҳам ташкил этилди. Бу эса меҳмонларда Ўзбекистонга нисбатан самимий муносабат ва қизиқишни янада оширди.
“Марказий Осиё – Uzbekistan Airways қанотларида” форуми — бу шунчаки тадбир эмас, балки халқаро туризм ва ҳаво алоқаларини мустаҳкамлаш йўлида ташланган жиддий ва таъсирли қадамдир. Uzbekistan Airways бу йўналишда етакчи куч сифатида ўз салоҳиятини яна бир бор намоён этди.
Шериклик ҳуқуқи асосида
Изоҳ (0)