АҚШ давлат департаменти Беларусда бўлиб турган фуқароларга мамлакатдан “дарҳол чиқиб кетишни”, бу давлатга сафарни режалаштиришдан тийилишни тавсия қилди.
Беларусь ҳукуматининг маҳаллий қонунларни ўзбилармонлик билан қўллаши, ҳибсга олиш хавфи, Россиянинг Украинага қарши давом этаётган урушини қўллаб-қувватлаш, шунингдек, минтақадаги барқарорликнинг пасайиши ва вазиятнинг олдиндан айтиб бўлмаслиги сабабли Беларусга саёҳат қилманг, дейилади давлат департаменти баёнотида.
Идора 2022 йилда Россиянинг Украинага кенг кўламли босқини бошланганидан сўнг кўп ўтмай АҚШ ўзининг Минскдаги элчихонаси фаолиятини тўхтатганини эслатди. Ўшанда идора америкаликларни мамлакатни тарк этишга чақирганди. Шундан кейин АҚШ Беларусга сафар қилиш бўйича ўз тавсияларини бир неча бор янгилаган. Мамлакат хавфнинг тўртинчи даражасига киритилган.
Давлат департаментининг навбатдаги огоҳлантируви мамлакатда 2025 йил 26 январга мўлжалланган президентлик сайлови яқинлашаётгани фонида эълон қилинди. Бу давлат раҳбари лавозими учун еттинчи сайлови ҳисобланади. Унда 1994 йилдан буён ушбу лавозимни эгаллаб келаётган амалдаги президент Александр Лукашенко ҳам қайта сайланмоқчи.
“Наша Нива” нашрининг ёзишича, Беларусда сайловлар арафасида хавфсизлик хизматларига овоз бериш пайтида норозилик билдириши мумкин бўлган барча шахсларни “саралаш” вазифаси юклатилган. Вилоятлар миқёсида “профилактик тинтув ва қамоққа олишга лойиқ” фуқаролар рўйхати тузилгани айтилмоқда.
Изоҳ (0)