AQSH davlat departamenti Belarusda bo‘lib turgan fuqarolarga mamlakatdan “darhol chiqib ketishni”, bu davlatga safarni rejalashtirishdan tiyilishni tavsiya qildi.
Belarus hukumatining mahalliy qonunlarni o‘zbilarmonlik bilan qo‘llashi, hibsga olish xavfi, Rossiyaning Ukrainaga qarshi davom etayotgan urushini qo‘llab-quvvatlash, shuningdek, mintaqadagi barqarorlikning pasayishi va vaziyatning oldindan aytib bo‘lmasligi sababli Belarusga sayohat qilmang, deyiladi davlat departamenti bayonotida.
Idora 2022-yilda Rossiyaning Ukrainaga keng ko‘lamli bosqini boshlanganidan so‘ng ko‘p o‘tmay AQSH o‘zining Minskdagi elchixonasi faoliyatini to‘xtatganini eslatdi. O‘shanda idora amerikaliklarni mamlakatni tark etishga chaqirgandi. Shundan keyin AQSH Belarusga safar qilish bo‘yicha o‘z tavsiyalarini bir necha bor yangilagan. Mamlakat xavfning to‘rtinchi darajasiga kiritilgan.
Davlat departamentining navbatdagi ogohlantiruvi mamlakatda 2025-yil 26-yanvarga mo‘ljallangan prezidentlik saylovi yaqinlashayotgani fonida e’lon qilindi. Bu davlat rahbari lavozimi uchun yettinchi saylovi hisoblanadi. Unda 1994-yildan buyon ushbu lavozimni egallab kelayotgan amaldagi prezident Aleksandr Lukashenko ham qayta saylanmoqchi.
“Nasha Niva” nashrining yozishicha, Belarusda saylovlar arafasida xavfsizlik xizmatlariga ovoz berish paytida norozilik bildirishi mumkin bo‘lgan barcha shaxslarni “saralash” vazifasi yuklatilgan. Viloyatlar miqyosida “profilaktik tintuv va qamoqqa olishga loyiq” fuqarolar ro‘yxati tuzilgani aytilmoqda.
Izoh (0)