“Дарё” нашри 28 мартда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Арманистон Путинни ҳибсга олиш қарорига қўшилдими?
17 март куни Халқаро жиноий суд Россия президенти Владимир Путинни Украинадаги ҳарбий жиноятларда айблаб, ҳибсга олишга ордер берди.
24 март куни Арманистон Конституциявий суди Рим статути мамлакат асосий қонунига зид эмаслиги ҳақидаги қарорини эълон қилди. Бу дегани, агар Ереван Рим статутини ратификация қилса, мамлакат расмийлари Путин Арманистонга келган тақдирда, уни ҳибсга олишга мажбур бўлади.
Айни вазиятда Россия томони ўзи тан олмайдиган Халқаро жиноий судга нисбатан Арманистоннинг муносабатини номақбул деб ҳисоблади ва Арманистонни Рим статутига қўшилган тақдирда икки томонлама муносабатларда “ўта салбий” оқибатларга дуч келишидан огоҳлантирган.
Аслида Арманистон 2022 йил охирида Рим статутини тан олиш учун Конституциявий судга мурожаат қилган. Бунинг сабаби Озарбайжонни Тоғли Қорабоғ бўйича икки томонлама можаро пайтида содир этилган “жиноятлар” учун жавобгарликка тортиш эди.
Украина Беларусни кузатмоқда, у Россия томонидан ҳужумга ўтиши мумкин
Украина Давлат чегара хизмати спикери Беларусдаги рус ҳарбийлари сони камайганини маълум қилди.
Ҳозир Беларусь ҳудудида 4 000 га яқин россиялик ҳарбий хизматчи қолди, бироқ Беларусь Россия бўлинмалари учун қуруқлик ва ҳаво ҳудудини беришда давом этмоқда.
Бу камайиш Россиянинг Беларусдан тайёрланган ҳарбий бўлинмаларини олиб чиқиб кетгани ва улар Россиядан Украина шарқига жойлаштирилаётгани билан изоҳланди.
25 март куни Россия президенти Путин Беларусь ҳудудида тактик ядро қуроллари жойлаштирилишини маълум қилганди. Беларусь раҳбари Александр Лукашенко агар Украина Буюк Британиядан уранга бойитилган снарядларни қабул қилса, “даҳшатли жавоб” бўлишини айтди. Украина Қуролли кучлари бош штаби Россия армиясининг Беларусдан ҳужум қилиш хавфи бир йилгача давом этишини билдирган.
Ироқда уруш олиб бориш ҳақидаги рухсатнома бекор қилинади
АҚШ Сенати Ироқда жанг олиб бориш учун 1991 ва 2002 йилларда қабул қилинган рухсатномаларни бекор қилиш тўғрисидаги қонун лойиҳасини маъқуллади. Бу ҳақда Reuters хабар бермоқда.
Конгресс аъзолари кўп йиллар давомида қонунчилар президентларга ҳарбий хизматчиларни урушга жўнатиш бўйича ҳаддан ташқари кўп ваколат бераётгани ҳақида баҳслашиб келади. Янги қонун лойиҳаси президентнинг ҳарбий ваколатларини чеклаш ва конституцияда кўрсатилган ҳолатларда ҳарбий ҳаракатлар бошлашни маъқуллаш бўйича Конгресснинг мутлақ ҳуқуқини тасдиқлашга мўлжалланган.
АҚШнинг Ироқдаги ҳарбий миссияси ёки Ироқ уруши 2003 йилда бошланган. Вашингтон қўшин киритилишини Саддам Ҳусайн ҳукумати оммавий қирғин қуролларини ишлаб чиқармоқда, деган тахмин билан оқлаган ва ҳарбийларни режимни ағдаришга чақирган. Мамлакатда энг кўп ҳарбий хизматчилар 2008 йилда жойлаштирилган — президент кичик Жорж Буш қарорига биноан у ерга деярли 158 минг киши юборилган.
2011 йилда операция тугаган деб эълон қилинди ва АҚШнинг кейинги президенти Барак Обама кўрсатмасига кўра, америкалик ҳарбийларнинг аксарияти мамлакатни тарк этди.
Ўзбекистонда февраль ойида аниқланган ноқонуний давлат харидлари 25 млрд сўмга етди
Ўзбекистонда 2023 йилнинг февраль ойида 25 млрд сўмлик ноқонуний давлат харидлари аниқланди. Февраль ойида ўтказилган таҳлил натижаларига кўра, вазирлик ва идоралар томонидан мазкур ойда жами 4,35 триллион сўмлик 77 411 та давлат хариди амалга оширилган.
Коррупцияга қарши курашиш агентлиги қайд этишича, ўрганишларда айрим давлат буюртмачилари томонидан давлат харидларини амалга оширишда қонунбузилиш ҳолатлари аниқланмоқда.
Бундай ҳолатлар Uzbekistan Airports АЖ буюртмачилигида, “Ҳудудий электр тармоқлари” АЖ Хоразм ҳудудий филиали буюртмачилигида аниқланди.
Мазкур ҳолатларда харид комиссияси томонидан ўзаро аффилланган иштирокчилар харид қилиш тартиб-таомилларида иштирок этишдан четлатилмасдан, “Давлат харидлари тўғрисида”ги қонуннинг 23-моддаси ва “Рақобат тўғрисида”ги қонуннинг 14-моддаси талаблари бузилган.
Агентлик томонидан киритилган тақдимнома ва сўровномалар натижасида 12 та давлат хариди бекор қилинган ҳамда 7 та маъмурий иш қўзғатилган.
Изоҳ (0)