Ўзбекистон Республикаси мустақилликка эришганидан сўнг мамлакат делегацияси саккизта ёзги Олимпия ўйинларида иштирок этди. Шу Олимпиадаларда умумий ҳисобда 18 та олтин медал қўлга киритилди. Қайд этиб ўтиш жоиз, бундан 24 йил аввал 1-октябрь санасида Муҳаммадқодир Абдуллаев Ўзбекистон делегациясига илк олтин медални тақдим этган эди. “Дарё” Олимпиадаларда Ўзбекистон учун олтин медални олиб келган спортчилар ҳақида маълумот беради.
Сидней—2000 (1 та олтин)
Ўзбекистон делегацияси 1996 йилда Атлантада ўтказилган Олимпиадада ўз иштирокини бошлаган. Спортчилар илк Олимпиадасида 1 та кумуш ва 1 та бронза медали билан кифояланган. 2000 йилда Сиднейда бўлиб ўтган Олимпиадада эса боксчи Муҳаммадқодир Абдуллаев Ўзбекистонга илк олтин медални тақдим этди.
Муҳаммадқодир Сидней Олимпиадасида -63,5 кг вазн тоифасида медал учун кураш олиб борди. Дастлабки босқичда Мигел Коттони таслим этган. Нимчорак финалда Беларусь вакили Сергей Буковскийни, ярим финалда жазоирлик Муҳаммад Аллалуни таслим этиб, финалга чиққан. Абдуллаев финал босқичида АҚШ вакили Рикардо Уильямсни 27:20 ҳисобида мағлуб этиб, олтин медалга эга чиққанди.
Афина—2004 (2 та олтин)
Грециянинг Афина шаҳрида 2004 йилда бўлиб ўтган мусобақа Ўзбекистон учун учинчи Олимпиада бўлди. Эркин кураш бўйича -120 кг вазн тоифаси финалида Артур Таймазов эронлик Алиризо Ризойига қарши татамига чиқди ва рақибига ҳеч қандай имконият қолдирмади. Таймазов Афинада бўлиб ўтган Олимпия ўйинлари олтин медалини қўлга киритди.
Юнон-рум кураши бўйича эса Александр Доктуришвили -74 кг вазн тоифасида финалга чиқди ва Финляндия вакили Марко Юли-Ҳаннуксела билан олтин медал учун кураш олиб борди. Александр финалда ғалаба қозониб, Афинадаги иккинчи, умумий ҳисобда эса учинчи олтин медални Ўзбекистон учун тақдим этди.
Рио—2016 (4 та олтин)
Афинадаги Олимпия ўйинларидан сўнг 2008 йил Пекинда, 2012 йил Лондонда бўлиб ўтган мусобақаларда Ўзбекистон делегацияси олтин медал қўлга кирита олмади. 2016 йилда бўлиб ўтган Риодаги Олимпиадада эса мустақил Ўзбекистон тарихидаги энг кўп медал қўлга киритилди. 4 та олтин, 2 та кумуш ва 7 та бронза билан спортчилар ўзбекистонлик мухлисларни хурсанд қилди.
Оғир атлетика бўйича -105 кг гача бўлган вазн тоифасида Руслан Нуриддинов олтин медални қўлга киритди. Шунингдек, ўзбекистонлик спортчи силтаб кўтаришда 237 кг оғирликни бўйсундириб, Олимпия рекордини ўрнатди.
Бокс бўйича -49 кг вазн тоифасида Ҳасанбой Дўстматов ҳал қилувчи жангга қадар мексикалик Хоселито Веласкес, қозоғистонлик Биржан Жакипов ва америкалик Нико Эрнандесни мағлуб этганди. Финалда эса Колумбия вакили Юберхен Мартинес Ҳасанбойга рақиблик қилди. Дўстматов 3 та раундда ҳам рақибига имкон қолдирмади ва Олимпия ўйинлари чемпионига айланди.
-52 кг вазн тоифасининг финал жангида Шаҳобиддин Зоиров россиялик Михаил Алоян билан рингга чиқди. Биринчи раундда россиялик чарм қўлқоп устасининг қўли баланд келган бўлса, қолган икки раундда ўзбекистонлик боксчи рақибидан устун келди ва олтин медални қўлга киритди. Шаҳобиддин Зоиров финал жангига қадар ирландиялик Брендан Ирвин, америкалик Антонио Варгас, озарбайжонлик Элвин Мамишзаде, венесуэлалик Ёэл Ривас каби спортчиларни мағлуб этишга муваффақ бўлганди.
Бокснинг -64 кг вазн тоифасидаги мусобақада эса Фазлиддин Ғоибназаров олтин медални қўлга киритган. Фазлиддин финалга қадар конголик Малонга Заламоу, ҳиндистонлик Манож Кумар, америкалик Гари Расселл, россиялик Виталий Дунайсев каби спортчиларни турнирдан чиқариб юборганди. Ҳал қилувчи босқичда ўзбекистонлик спортчига Озарбайжон вакили Колласо Сотомаёр рақиблик қилди. Уч раунд давом этган жангда ҳакамлар қарорига кўра Фазлиддин ғалаба қозонди ва Олимпиада чемпионига айланди.
Токио—2020 (3 та олтин)
2020 йил Япониянинг Токио шаҳрида бўлиб ўтиши керак бўлган Олимпия ўйинлари коронавирус пандемияси сабаб бир йилга кечиктирилди. 2021 йилнинг 23 июлидан 8 августигача бўлган муддатда ўтган ўйинларда Ўзбекистон делегацияси 3 та олтин медалга эга чиқди.
Токио Олимпиадасида биринчи олтин медални таэквондочи Улуғбек Рашидов қўлга киритди. Улуғбек финалда британиялик рақиби Бредли Синденни мағлуб этди ва чемпионга айланди. Шу тариқа у таэквондо бўйича Олимпиадада чемпион бўлган илк спортчи сифатида Ўзбекистон тарихига кирди.
Оғир атлетиканинг -109 кг вазн тоифаси вакиллари ўртасида кечган мусобақада Акбар Жўраев умумий 430 кг вазнни бўйсундирди. Бу билан 21 ёшли Жўраев биринчи натижани қайд этиб, олтин медалга сазовор бўлди. Шунингдек, ўзбекистонлик спортчи силтаб кўтариш ва икки курашда Олимпия рекордини ўрнатди.
Бокс бўйича +91 кг вазн тоифасида ҳаракат қилган Баҳодир Жалолов финал баҳсида америкалик Ричард Торресни 5:0 ҳисобида мағлубиятга учратди ва мусобақанинг олтин медалига эга чиқди. Ўзбекистонлик боксчи ярим финалда Буюк Британия вакили Фрэйзер Кларкк устидан ғалаба қозонганди.
Париж—2024 (8 та олтин)
Ҳозирча ёзги Олимпиадалар ичида сўнггиси бўлиб турган мусобақа Ўзбекистон делегацияси учун омадли келди. 26 июлдан 11 августга қадар давом этган Олимпия ўйинларида Ўзбекистон 8 та олтин медални жамғаришга муваффақ бўлди.
Париж Олимпиадасидаги илк олтин медални дзюдочи Диёра Келдиёрова олиб келди. -52 кг вазн тоифасида ҳаракат қиладиган Диёра финалда косовалик Дистрия Красничини мағлуб этиб, Олимпия ўйинлари чемпионлигини қўлга киритган илк ўзбекистонлик дзюдочига айланди.
Таэквондочи Улуғбек Рашитов эса кетма-кет иккинчи марта Олимпиада чемпионлигини қўлга киритди. Нимчорак финалда 22 ёшли спортчи гонгконглик рақибини, чорак финалда эса хитойлик Лианг Юшуайни мағлуб этганди. Ярим финалда эса испаниялик Хавер Пересдан устун келганди. Финалда эса Рашитов иорданиялик Заид Каримга ҳеч қандай имкон қолдирмади.
Париж Олимпиадасида эркин кураш мусобасида Ўзбекистон шарафини ҳимоя қилган эркин курашчи Разамбек Жамалов эса финалда япониялик Даичи Такатанини мағлуб этишга муваффақ бўлди.
Бокс мусобақаларида эса Ўзбекистон делегацияси чинакам тарих ёза олди.
-51 кг вазн тоифасида ҳаракат қиладиган Ҳасанбой Дўстматов франциялик Билол Беннамага қарши жанг қилди ва рақибига имкон қолдирмасдан, Олимпиада олтин медалини қўлга киритди.
-71 кг вазн тоифасида ҳаракат қиладиган Асадхўжа Мўйдинхўжаев эса ҳар қилувчи баҳсда мексикалик Марко Алонсо Вердени таслим этди ва олтин медалга эга чиқди.
-92 кг вазн тоифаси вакили Лазизбек Муллажонов финалда озарбайжонлик Алфонсо Домингесни таслим этди.
Абдумалик Ҳалоков (-57 кг) ҳам ўз совринлари орасига Олимпиада олтин медалини қўшиб қўйди. Ҳалоков финалда қирғизистонлик Мунарбек Сеитбек Уулуга қарши жанг қилиб, қийинчиликсиз ғалаба қозонди.
+92 кг вазн тоифасида Баҳодир Жалолов кетма-кет иккинчи олтин медалини қўлга киритди. Жалолов финалга қадар ҳеч қандай қийинчиликсиз етиб борди ва ҳал қилувчи жангда ҳам испаниялик Айюб Гадфага имкон қолдирмади.
Маъруфжон Очилов тайёрлади
Изоҳ (1)
Ахмоклармиз