Қўшма Штатлар Россия ва хориждаги 400 нафар шахс ва юридик шахсларга нисбатан санкциялар жорий қилди, дея АҚШ Молия вазирлиги хабар берди.
АҚШ Молия вазирлиги ва Давлат департаменти Россияда ва хорижда, жумладан, Осиё, Европа ва Яқин Шарқда Россиянинг ҳарбий саъй-ҳаракатларини қўллаб-қувватлаш ва санкцияларни четлаб ўтиш имконини берувчи товар ва хизматлар ишлаб чиқарадиган 400 га яқин жисмоний ва юридик шахсларга нисбатан санкция қўлламоқда, дейилади баёнотда.
Оқ уйнинг аниқлик киритишича, янги пакет Украинанинг яқинлашиб келаётган Мустақиллик кунига тўғри келади. Шунингдек, чекловлар Россия учун қурол-яроғ ва мудофаа маҳсулотлари харид қилиш билан шуғулланувчи компанияларга, санкцияларни четлаб ўтиш, санкцияланган олтин қазиб олиш ва олтин сотишдан тушган даромадларни ювиш схемалари иштирокчиларига, шунингдек, кўмир қазиб олиш компанияларига қаратилган.
АҚШ президенти маъмурияти ушбу киритилган санкциялар “Россиянинг металл ва тоғ-кон саноатидан келадиган даромадларини янада чеклашини” айтган.
Бундан ташқари, Америка санкциялари Россия, Беларусь, Италия, Швейцария, Австрия, Хитой ва Туркия фуқаролигига эга бўлган шахсларга таъсир кўрсатди. Ҳаммаси бўлиб СDN рўйхатига 50 га яқин киши киритилган. Улар орасида Россия мудофаа вазири Андрей Белоусовнинг ўғли Павел Белоусов ҳам бор.
Изоҳ (0)