Россия Хавфсизлик кенгаши раисининг ўринбосари, собиқ президент Дмитрий Медведевнинг фикрича, Россия Украинада ғалаба қозонганидан сўнг, янги чегаралар бўйича фундаментал келишувларсиз “аллақандай битимлар” тузилади, аммо Украина ва Ғарб давлатлари расмийлари глобал можарони “яна қўзғатади”, Россия бунга йўл қўймаслиги керак.
“Шунинг учун ҳам махсус ҳарбий операциянинг барча мақсадларига эришиш жуда муҳим. Мамлакатимизга таҳдидлар чегараларини иложи борича узоқроққа, ҳатто Польша чегараларигача бўлса ҳам, суриб ташлаш керак. Неонацизмни ер билан яксон қилиш керак”, — деб ёзди Медведев Telegram’даги постида.
Унинг фикрича, Москва ва Киев ўртасидаги бўлажак музокаралар қийин ва асабий руҳда бўлади, чунки ҳақиқий қарорлар Украина расмийлари томонидан эмас, балки “чет элда” қабул қилинади. Мухолифлар Москвани имкон қадар заифлаштириш ниятида ва шунинг учун улар Украинадаги уруш давом этишини исташади, дея таъкидлади Россия собиқ президенти.
Аввалроқ Медведев агар АҚШ Россияни мағлуб этмоқчи бўлса, Москва ўзини ҳар қандай қурол, жумладан, ядровий қурол билан ҳимоя қилишга ҳақли эканини даъво қилганди. Медведев Россия президенти Владимир Путиннинг “Россияни жанг майдонида енгиб бўлмайди” деган сўзларини келтириб ўтган.
Маълумот учун, Польша ҳукумати Россия ва Беларусь билан чегараларда мудофаа тўсиқларини, жумладан, танкка қарши тўсиқларни ўрнатишни бошлагани ҳақида хабар берилган. Мамлакат мудофаа вазири Польша—Россия ва Польша—Беларусь чегараларида назорат-ўтказиш пунктлари яқинидаги йўлда металл ва бетондан ясалган танкка қарши тўсиқларнинг бир нечта фотосуратларини эълон қилди.
Изоҳ (0)