Беларусь президенти Александр Лукашенко мамлакати эҳтимолий урушга тайёр туриши кераклигини айтди. Шу билан бирга, у беларусларга конфликт керак эмаслигини таъкидлади. Бу ҳақда “БелТА” хабар берди.
Лукашенко миллий хавфсизлик тизими давлат органлари раҳбарияти билан кенгайтирилган йиғилишда тегишли баёнотни берган.
“Бизга уруш керак эмас, шунинг учун унга ҳам руҳий, ҳам стратегик жиҳатдан тайёр бўлишимиз керак. Айни вазиятнинг жиддийлигини англашга келсак, келинг, глобал конфликтни дипломатик йўл билан ҳал қилиш имконияти ҳақидаги барча иллюзиялардан воз кечайлик. Халқаро ҳуқуқ ҳам тарангликни юмшатишга қодир эмас”, —дейди Лукашенко.
Беларусь президентининг таъкидлашича, Ғарб “янги, аммо аллақачон АҚШ ва Европа Иттифоқи томонидан назорат қилинадиган минтақавий ташаббусларни яратишга” ҳаракат қилмоқда.
“Режа ниҳоятда ибтидоий. Унга Польша, Руминия, Венгрия ва Словакиядан ташқари нейтрал Украина ва Беларусь ҳам кириши керак. Шарти Беларусь Россиядан узилади”, — дейди у.
- 2022 йил бошида Беларусь президенти АҚШни урушга ундаётганликда айблаган, бир оздан кейин эса Ғарб “бегона қўллар” билан жанг қилишга интилаётганини айтганди.
- 2023 йилнинг сентябрида Лукашенко Украинадаги уруш сабабли Беларусь мудофаа билан жиддий шуғулланиши кераклигини таъкидлаган.
- 2024 йил 7 февраль куни Беларусь президенти Ўзбекистонга келган эди. У ва президент Шавкат Мирзиёев билан тор доирада учрашув бўлиб ўтган. Томонлар халқаро тузилмалар, шу жумладан, Бирлашган Миллатлар Ташкилоти, МДҲ, ШҲТ доирасидаги сиёсий мулоқот ва ўзаро қўллаб-қувватлашни давом эттиришга аҳдлашиб олган. Ўзбекистон ва Беларусь ўртасида товар айирбошлаш ҳажмини яқин йилларда 1 млрд доллардан ошириш вазифаси қўйилган. Ташриф давомида Александр Лукашенко президент билан пойтахтдаги Texnoparkка, “Ҳума Арена”га ташриф буюриб, Амирсойда чанғи учишган.
Изоҳ (0)