АҚШнинг сайланган президенти Дональд Трамп лавозимга киришганидан кейин ҳам Украинага ёрдам беришни давом эттиришни режалаштирмоқда. Бу ҳақда республикачи жамоасига таяниб Financial Times (FТ) хабар берди.
FТ манбаларига кўра, Трамп НАТО аъзоларидан мудофаа харажатларини ялпи ички маҳсулотнинг 5 фоизигача оширишни талаб қилмоқчи. Музокаралар билан таниш шахсларга кўра, АҚШ сайланган президентининг ташқи сиёсат бўйича энг яқин ёрдамчилари жорий ойдаги маслаҳатлашувлар чоғида Европанинг юқори мартабали амалдорларини унинг позицияси ҳақида хабардор қилган.
Нашрнинг қайд этишича, ҳозирда НАТОнинг 32 аъзосидан атиги 23 таси ҳарбий эҳтиёжларга ўз ялпи ички маҳсулотининг камида 2 фоизини сарфламоқда. Бу харажатларни 5 фоизгача ошириш уларни икки баравар кўпайтиришни англатади.
Трампнинг режалари билан таниш бўлган Европа амалдорларидан бири нашр билан суҳбатда гап ЯИМнинг “уч ёки ундан кўпроқ фоизи” ҳақида бораётганини таъкидлаган. Унга кўра, АҚШ бу мавзуни 2025 йил июнь ойида Гаагада бўлиб ўтадиган Шимолий Атлантика альянсининг саммитида муҳокама қилиш ниятида.
Оқ уй маълумотларига кўра, 2024 йилда АҚШнинг мудофаа харажатлари ЯИМнинг тахминан 3,1 фоизини ташкил этади. FT'нинг қайд этишича, Трампнинг биринчи президентлик муддатининг сўнгги йилида (2020 йилда) Пентагон харажатлари 3,4 фоизга етган.
НАТОнинг асосий аъзо давлатлари - Германия, Франция, Буюк Британия, Италия ва Польша вакиллари, шунингдек, альянс бош котиби Марк Рютте 18 декабрь куни Брюсселда Украина президенти Владимир Зеленский билан учрашув ўтказган эди. Муҳокамаларнинг муҳим мавзуси Трамп Оқ уйга қайтганидан сўнг Европа хавфсизлик сиёсатининг келажак йўналишлари бўлди.
Германия канцлери Олаф Шольц 19 декабрь куни Трамп билан телефон орқали суҳбатлашди. Ушбу суҳбатдан сўнг Германия ҳукумати раҳбари журналистларга “АҚШ ва Европанинг Украинага ёрдам кўрсатишни давом эттириши”га тўлиқ ишонишини айтди.
Зеленский Брюсселдаги Европа кенгаши йиғилишидан кейинги матбуот анжуманида АҚШ ва Европа иттифоқининг Киев учун биргаликдаги хавфсизлик кафолатлари муҳимлигини таъкидлади.
“Европанинг кафолатлари Украина учун етарли бўлмайди. Буни фақат Европа етакчилари билан муҳокама қилиш мумкин эмас. Биз учун, бугунги кунда ёки келажакда бўлишидан қатъи назар, ҳақиқий кафолатлар — бу НАТО. НАТО эса ҳам АҚШ, ҳам Европа етакчиларининг қарорларига асосланади”, дейди Украина етакчиси.
Изоҳ (0)