1965 йилда “I операцияси” фильми экранларга чиқишидан аввал актёр Александр Демяненкога бошқа фильмлар учун бош роллар таклифини беришган. У “Давлат жиноятчиси”, “Дима Горин карьераси” фильмларида суратга тушган. Табиатан камтарин ва камгап Александр Шурик образи эса унга катта муваффақият ва машҳурлик келтирди. Сўнг у ўз карьерасини “Кавказ асираси” ва “Иван Василевич касбини ўзгартиради” фильмларидаги роллари билан мустаҳкамлади.
Доимо драма йўналишида ишлашни истаса-да, “I операцияси ва Шурикнинг бошқа саргузаштлари” фильми учун Демяненко Гамлет ролидан воз кечган. Кўчаларда уни кўриб қолганлар “Ана, Шурик келяпти” дея ҳайқиришлари унга ҳеч ҳам ёқмаган. Шу сабабли Демяненко талаба Шурик образини ёмон кўра бошлаган.
Шурик роли учун кастинг қандай ўтган?
Сценарийни ёзиш вақтида Леонид Гайдай Шурик образини ўзининг ҳаётдаги характерига ўхшатишга ҳаракат қилган. Кейинроқ режиссёрнинг рафиқаси Нина Гребешкованинг айтишича, режиссёр табиатан характери ўзига яқин актёрни излаган.
Кастингда Андрей Миронов, Александр Збруев, Олег Видов ва бошқа актёрлар иштирок этган. Бадиий кенгаш Валерий Носикни мазкур ролга мос деб ҳисоблаган. Аммо Гайдай Шурик сифатида фақат Александр Демяненкони кўра олган.
Режиссёр бундан аввал актёр билан ишлаган: улар “Шамол” фильмида бирга рол ижро этган. Гайдай шахсан Ленинградга Демяненко билан учрашиш учун кетган. Актёрга сценарий маъқул келган ва у суратга тушишга рози бўлган.
Александр Демяненконинг кейинг фаолияти
Леонид Гайдайнинг ёрқин комедияларидан сўнг халқ орасида битта образда танилган Демяненко театрда ишини давом эттирди, Ленинград телевидениесидаги теледастурни олиб борди ҳамда дубляж ишларида фаол иштирок этди. 1980 йилларда актёр Роберт де Ниро, Жан-Поль Белмондо, Омар Шарифларга овоз берди.
Орадан ўн йил ўтгач, у “Қулупнай” ситкомида бош ролни ижро этиб, экранларга қайтди. Аммо Демяненко бу таклифга фақат пул учун рози бўлганини яширмади.
Актёрнинг юраги билан боғлиқ жиддий муаммолари бўлган. Инфарктни бир марта оёқда кечирган Демяненко орадан бир оз вақт ўтиб, қайта инфаркт бўлиб қолган. Жарроҳлик амалиёти ўтказилиши керак бўлган, аммо актёр унгача етиб боролмаган. Александр Демяненко 1999 йил августда вафот этди.
Изоҳ (0)