Tesla ва SpaceX каби йирик компанияларнинг эгаси Илон Маск OpenAI’ни сотиб олиш учун Facebook асосчиси Марк Цукербергдан ёрдам сўраган. Бироқ Цукерберг бу таклифни рад этган. Бу ҳақда Reuters агентлиги хабар берди.
Манбага кўра, OpenAI ўзининг ChatGPT сунъий интеллекти билан бутун дунёга машҳур. Илон Маск эса OpenAI’ни 97 миллиард долларга сотиб олишни истаганди.
Сунъий интеллект компаниясининг судга берган аризасида, Илон Маск OpenAI’ни сотиб олиш ва унга инвестиция киритиш масаласини Марк Цукерберг билан муҳокама қилгани айтилган. OpenAI Маск ва Цукербергнинг компанияни сотиб олиш борасида ўтказилган суҳбатлар ёзишмаларини тақдим этишни сўраган.
Август ойининг бошида АҚШ туман судьяси Ивон Гонсалес Рожерс миллиардер Илон Маск OpenAI’нинг ёзган шикояти бўйича жавоб бериши керак, деган қарор чиқарган. Компания миллиардернинг матбуотдаги чиқишлари, ижтимоий тармоқлардаги постлари ва сотиб олиш ҳақидаги сохта таклифлари сабабли зарар кўрганини билдирган.
Tesla раҳбари Илон Маск 2024 йили нотижорат ташкилотдан фойда олиш моделига ўтгани учун OpenAI’нинг раҳбари Сем Алтманни судга берган эди. Шу йилнинг апрель ойида OpenAI ҳам Илон Маскка қарши даъво аризаси киритган.
Илон Маск ва OpenAI ўртасидаги масала бўйича суд мажлиси 2026 йилнинг баҳорида бўлиб ўтиши режалаштирилган.
Изоҳ (0)