Ҳар бир қисми учун 20 минг доллар: “Муҳташам юз йил” сериалидаги бош қаҳрамонлар қанча гонорар олган? 

Турк сериаллари қамрови ва қизиқарли сюжети билан томошабинлар қалбидан жой олганига анча бўлди. Аммо “Муҳташам юз йил” шу қадар машҳур бўлдики, у турк кино саноатининг доимий юлдузига айланди. Усмонлилар империяси тарихи, ўша даврдаги турли урушлар ва сарой ичида бўлиб ўтган можаролар дизи томошабинларини эътиборсиз қолдирмади.

Ҳар бир муваффақиятли лойиҳа ортида истеъдодли актёрларнинг меҳнати ётади. Бугун “Муҳташам юз йил” сериали бош қаҳрамонлари узоқ муддат давом этган иши учун қанча миқдорда гонорар олгани ҳақида маълумот берамиз.

Энг катта гонорар Ҳалит Эргенчга тегишли эди

Султон Сулаймон ролини ижро этган актёр — Ҳалит Эргенч ҳар бир эпизод учун 20 минг доллар ҳақ олган, бу миқдор уни лойиҳадаги энг кўп маош олувчи актёрга айлантирган. “Муҳташам юз йил” сериали жами 139 қисмдан иборат бўлишини ҳисобга олсак, Эргенч биргина лойиҳадан 2,7 миллион доллардан кўпроқ даромад олгани аниқланади.

Лекин бу ҳаммаси эмас. Ҳалит Эргенч сериални хорижга сотиш ҳуқуқидан маълум фоизда даромад олган ягона актёр эди. Шу сабабли унинг ҳар бир қисмдаги умумий даромади 40 минг долларгача етган. “Бундай катта миқдордаги гонорар, албатта, бошқа ҳамкасбларда ҳам турли саволлар ва низолар вужудга келишига сабаб бўлгани шубҳасиз”, деб ёзади “Комсомолская правда” нашри.

Марям Узерли доим унга кам маоши тўланган деб ҳисоблаган

Султон Сулаймоннинг асосий канизаги Хуррам Султон ролини ўйнаган Марям Узерли ҳар бир серия учун 17 минг доллар миқдорда гонорар олган. Бу катта миқдор бўлишига қарамай, Ҳалит Эргенчникидан камроқ. Бундан ташқари, актриса бош роллардан бирини ижро этган бўлса-да, унга хорижда эфирга узатилишдан олинган даромаддан ҳеч қандай фоиз тўланмаган, шу сабабли актриса доим оладиган маошидан норози бўлган.

Иброҳим пошо ролини ижро этган Окан Ялабик Марям Узерли билан бир хил даромад олган. Бироқ у ва бошқа асосий актёрлар режиссёрларга бу ҳақда шикоят қилмаган ва бор эътиборини ишга қаратган.

Бошқа актёр ва актрисаларнинг гонорари

Тарихий сериалда суратга тушган бошқа машҳур турл актёрлари ҳам лойиҳадан мўмай даромад олган, жумладан:

Бурак Ўзчивит (Балибей) — сериалнинг бир қисми учун 17 минг доллар;

Нур Феттаҳўғлу (Моҳидаврон) ва Меҳмет Гунсур (шаҳзода Мустафо) — ҳар бири 14 минг доллардан;

Озан Гувен (Рустам пошо) —14 минг доллар.