Голливудда қон ришталари муҳим рол ўйнаши ҳақиқат. Ота-она ёки бобосининг изидан борган мусиқачилар-у, актёрликни танлаган шоу-бизнес вакилларининг фарзандлари кўп учрайди. Ушбу мақолада Голливуднинг таниқли оиласида туғилиб ўсган ва ота касб — кино саноатини танлаган машҳурларни кўриб чиқамиз.
Дакота Жонсон
Дакота Жонсон актёр Дон Жонсон ва актриса Мелани Гриффитнинг қизидир. Актриса Альфред Ҳитчкокнинг “Қушлар” (1963), “Marni” (1964) триллерлари ва “Гонконг Графиняси” фильмлари билан танилган Типпи Ҳедреннинг набирасидир.
Дакотанинг онаси Мелани Гриффит ўз даврининг машҳур актрисаси бўлиб, Типпининг ягона қизидир. Уларнинг авлоди Голливуддаги кўплаб юлдузлар сингари муҳожирлар оиласи бўлган. Улар Америкага Швециядан келган, онасининг аждодлари эса норвег ва немис бўлган.
Крис Пайн
Янгиланган “Стар Трек” (2009–2016) ва “Ерости ва аждаҳолар” (2023) фильмлари юлдузи Крис Пайн ҳам актёрлар оиласидан чиққан. Унинг бувиси кино тарихида кучли овози билан “ҳайқириқ маликаси” сифатида машҳур бўлган Энн Гвиндир. У 1939 йилда 21 ёшида актёрлик фаолиятини бошлади ва йигирма йил давомида фаол ишлади. 50 йилларнинг охирига келиб актриса 41 ёшида Голливудни тарк этди. Криснинг ота-онаси актриса Гвин Гилфорд ва актёр Роберт Пайндир.
Жорж Клуни
Актёр Жорж Клуни White Christmas ва Mambo Italiano номли хит қўшиқлари билан машҳур хонанда ва актриса Розмари Клунининг жиянидир. Унинг энг машҳур кино лойиҳаси “Порлоқ Рождество” (1954) мусиқий романтик комедияси бўлган. эди. Розмари Клуни жами 18 та фильм ва телесериалларда иштирок этган ва АҚШда у асосан хонанда сифатида танилган. Жоржнинг отаси, тележурналист Ник Клуни Розмарининг укасидир.
Дрю Берримор
“Ўзга сайёралик”, “Ваъда бериш — уйланиш дегани эмас”, “Чарли фаришталари” фильмларидаги образлари билан Голливудда машҳур бўлган актриса Дрю Блайт Берримор 1875 йилга бориб тақаладиган актёрлар оиласидан. Бу сулолага унинг катта бобоси, муваффақиятли театр актёри Морис Барримор ҳамда унинг қизи — Берриморнинг бувиси Жоржи Дрю асос солган. Морис ва Жоржининг фарзандлари Жон, Лионель ва Этел Америка кино афсоналарига айланди.
Дрюнинг бобоси Жон Берримор 18 ёшидан бошлаб отасининг спектаклларида чиқа бошлаган. У “Гамлет” (1922), “Шерлок Холмс” (1922) ва “Гранд меҳмонхонаси” (1932) фильмларида суратга тушган.
Уна Чаплин
“Тахтлар ўйини” (2011–2019) ва “Табу” (2017) сериалларининг юлдузи Уна Чаплин таниқли инсонлар оиласида туғилган. Унинг онаси таниқли актриса Жералдин Чаплин, бобоси овозсиз кино афсонаси Чарльз Чаплиндир. Катта бобоси эса америкалик драматург Южин O’Нилдир.
Кейт Бёртон
Америкалик кино ва театр актрисаси, телебошловчи Кейт Бёртон театр ва кино афсонаси Ричард Бёртоннинг беш нафар фарзандларидан бири. Кейтнинг онаси Ричарднинг биринчи турмуш ўртоғи Сибил Уильямсдир.
1979 йилда Кейт Браун университетининг Рус тили ва Европа тарихи факультетини тамомлаган. Талабалик пайтида у театр санъатига қизиқиб қолди ва Ел театр мактабига ўқишга кирди ҳамда магистрлик даражасини олди. Актриса театр, кино ва телевидениедаги фидойи фаолияти учун бир неча номинацияларда турли мукофотларни қўлга киритган.
Изоҳ (0)