Бугун, 22 август куни президент Шавкат Мирзиёев амалий ташриф билан Туркманистонда бўлди. Ташриф доирасида етакчиларга маданий дастур намойиш қилинди.

Президент матбуот хизмати хабарига кўра, Ўзбекистон ва Озарбайжон президентлари туркман халқи миллий етакчиси Гурбангули Бердимуҳамедов билан “Аваза” конгресс маркази ёнидаги махсус майдонга борган.

Меҳмонларга “Галкиниш” миллий от спорти жамоаси ахалтака зотли тулпорларининг чиқишларини намойиш этган.

Дунёга машҳур “Галкиниш” от спорти гуруҳи бу йил Монте-Карлода бўлиб ўтган 47-халқаро цирк фестивалида муваффақиятли иштирок этиб, олтин мукофотга сазовор бўлди. Шунингдек, Истанбулда ўтказилган Халқаро этноспорт фестивалида муваффақиятли иштирок этди, дейилади манбада.

Гурбангули Бердимуҳамедов ўзбек халқига чуқур ҳурмат-эҳтиром рамзи сифатида Шавкат Мирзиёевга тўкин-сочинлик ва фаровонлик рамзи бўлган туя ва бўталоқни совға қилган.

Аввалроқ етакчилар учрашиб, қатор масалаларда музокаралар ўтказгани, кўплаб келишувларга эришгани хабар қилинганди.
Изоҳ (0)