Буюк Британия мудофаа вазири ўринбосари Алистер Карнс агар катта уруш бўлса, мамлакат армияси “олти ойдан бир йилгача” йўқ қилиниши мумкинлигини айтди. Бу ҳақда Politico хабар берди.
Октябрь ҳолатига кўра, Британия армияси сони 109 245 кишини, шу жумладан, 25 814 нафар кўнгилли захирачини ташкил этган. Армиянинг ҳозирги сони билан уруш бўлса, 12 ой ичида кучлар йўқотишларга учраши мумкин.
Армиямиз Украинадаги каби кенг кўламли урушда ҳозирги йўқотишлар даражасида олти ойдан бир йилгача тугаб қолиши мумкин, деди Карнс.
Унга кўра, турли ҳисоб-китобларга асосан Россия-Украина урушида ҳар куни 1500 га яқин рус аскари ҳалок бўлмоқда ёки яраланмоқда. Алистер Карнс бундай шароитда захирадаги ҳарбийлар “ҳал қилувчи, мутлақо марказий аҳамиятга” эга бўлишини айтди. Шу сабабли Британияга кўп сонли армия эмас, инқироз юз берган тақдирда “тезкорлик билан куч ишлатиш” имкониятига эга бўлиш учун захирадаги аскарлар сонини кўпайтириш муҳимдир.
Британия аҳолиси ихтиёрий равишда резервга ёзилиши мумкин, улар бўш вақтларида ҳарбий тайёргарликдан ўтади ва бунинг учун пул олади.
Изоҳ (0)