Сеҳрли Ҳогварц мактаби ва Гарри Поттер ҳақидаги фильмда бош қаҳрамоннинг дўсти Рон Уизли роли билан машҳур бўлган Руперт Гринтга катта миқдорда жарима солинди. Бу ҳақда “Нур.кз” хабар берди. Актёр франшизадан тушган қўшимча даромадларини Британия солиқ тизимидан яширишга ҳаракат қилган.
Яқинда бўлиб ўтган Британия солиқ идоралари билан суд ишида Руперт Гринт мағлуб бўлди. Эндиликда актёр 2 миллион 300 минг доллар жарима тўлаши шарт.
2019 йилда Британия солиқлар ва божхона тўловлари бошқармаси актёрнинг 2012 йилги солиқ декларациясида хатолик аниқлади. Гринт фильмлардан, жумладан, DVD дисклар сотуви, стриминг тизими ва теледастурлардан келган 4,5 миллион фунт стерлинг (салкам 6 миллион доллар) даромадни камроқ солиққа тортиладиган асосий актив сифатида кўрсатган. Шу сабабли актёр даромад солиғи бўйича 52 фоиз ўрнига атиги 10 фоиз солиқ тўлаган.
Солиқ органлари бу маблағларга юқорироқ ставкада солиқ солиш кераклигини кейинроқ аниқлади. Сўнг Гринтнинг адвокатлари апелляцияга берди, аммо суд ҳайъати мазкур маблағ тўлиқ солиққа тортилиши шарт деб қарор қилди. Шундай қилиб, актёр солиқлар ва жарималарни тўлиқ тўлашга мажбур бўлди.
Руперт Гринтнинг сўзларига кўра, молиявий масалаларнинг барчаси унинг отаси томонидан бошқарилган. Эслатиб ўтамиз, актёрнинг 2001 йилда, 12 ёшида “Гарри Поттер ва ҳикматлар тоши” фильмида дебют қилган. У франшиза кейинги етти қисмнинг барчасида Рон ролини ўйнаган.
Изоҳ (0)