Песков Россия ядро қуролидан қандай шароитда фойдаланиши мумкинлигини маълум қилди

Россия мамлакат мавжудлигига ҳақиқий таҳдид юзага келган тақдирдагина ядро қуролидан фойдаланиши мумкин. Бу ҳақда Россия президентининг матбуот котиби Дмитрий Песков CNN телеканалига берган интервьюсида маълум қилди.

«Миллий хавфсизлик концепциямиз бор, у очиқ бўлиб, ядро қуролидан фойдаланишга олиб келадиган барча сабабларни ўқиб олишингиз мумкин. Яъни мамлакат мавжудлигига таҳдид юзага келса, ундан концепциямизга мос равишда фойдаланилиши мумкин», — дейди Песков.

27 февраль куни президент Владимир Путин мудофаа вазири Сергей Шойгу ва Бош штаб раҳбари Валерий Герасимов билан учрашди. Йиғилишда у тўхтатувчи кучларни махсус шай ҳолатга келтиришни буюрган. Тўхтатувчи кучлар жумладан ядровий кучларни англатади. Путин ушбу қарорни НАТОдаги етакчи давлатларнинг юқори мансабдор шахслари «Россияга қарши тажовузкор баёнотлар янграшига йўл қўяётгани» билан изоҳлаган.

Россия ташқи ишлар вазири Сергей Лавров ядровий уруш бошланишига ишонмаслигини маълум қилганди. «Диққатингизни шу нарсага қаратмоқчиманки, Украинада сўнгги йилларда содир бўлаётган воқеалар ҳамда охирги ойлар ва ҳафталардаги кескинликда ядро мавзусини фақат Ғарб вакиллари, биринчи навбатда НАВО аъзолари муҳокама қилмоқда», — деган эди вазир.

Лавров Ғарб сиёсатчилари томонидан билдирилган қатор фикрларни мисол қилиб келтирган. Буюк Британия ташқи ишлар вазири Лиз Трасс НАТО ва Россия ўртасидаги можарони истисно этмаган. Франция ТИВ раҳбари Жан-Ив Ле Дриан ўз навбатида, Путин мазкур мамлакатда ҳам ядро қуроли борлигини унутмаслигини маълум қилган.

Россия ТИВ раҳбари сўзларига мисол сифатида АҚШ президенти Жо Байденнинг санкцияларга муқобил жавоб фақат Учинчи жаҳон уруши бўлиши борасидаги гапларини келтирган.

Песков CNN’га интервьюсида Украинадан Россияга келган қочқинлар учун «менҳат лагерлари» борлиги тўғрисида хабарларни рад этган. «Биз нафақат ҳарбий операция шароитида, балки қаттиқ ахборот уруши, фейклар урушида яшаяпмиз», — дея таъкидлаган Песков. Унинг сўзларига кўра, Россия Украина Донбассга қарши ҳарбий операция ўтказишга тайёрланаётгани тўғрисида маълумотга эга бўлган. Песковнинг айтишича, Москва «норманд формати»да прогрессга эришишга умид қилган.

Аввалроқ The Washington Post газетаси Мариупол раҳбариятига таяниб, шаҳар аҳолиси Россияга жўнатилишдан олдин уларнинг телефон ва ҳужжатлари Новоазовскдаги «фильтрлаш лагери»да текширилаётганини маълум қилган.

Россиянинг АҚШдаги элчихонаси Америка ОАВларини «барча чегараларни бузиб ўтаётган» нопрофессионаллик ва ёлғон айблаган.