Ўзбекистон Марказий банки жорий йил январь–октябрь ойларидаги трансчегаравий пул ўтказмалари тўғрисида маълумот берди.
Қайд этилишича, 10 ой мобайнида хориждан Ўзбекистонга келиб тушган пул ўтказмалари 12,6 миллиард долларни ташкил этган. Бу рақам 2023 йил мос даврига нисбатан 34 фоизга кўп.
Маблағларнинг 78 фоизи Россиядан (9,8 миллиард доллар) келиб тушган бўлиб, ўтган йил мос давридагидан 35 фоизга ошган. Трансфертларнинг қолган қисми Қозоғистон (699 миллион доллар), АҚШ (470 миллион доллар), Жанубий Корея (458 миллион доллар), Туркия (331 миллион доллар), Буюк Британия (109 миллион доллар) ва бошқа мамлакатлардан ўтказилган, дейилади регулятор шарҳида.
Марказий банк ўз таҳлилида халқаро пул ўтказмалари ҳажми ўсишига қатор омиллар таъсир кўрсатганини келтирган. Хусусан, мигрантларни ишга қабул қилувчи асосий ҳамкор давлатларда иқтисодий фаоллик кузатилиши, иш ҳақи кўтарилгани ҳамда ривожланган мамлакатларга меҳнат миграцияси оқими ортган. Масалан, Россияда меҳнат муҳожирлари фаолият юритадиган соҳаларда таклиф қилинаётган иш ҳақи миқдори ўртача 38 фоизга ўсган. Қурилиш соҳасида иш ҳақлари 55 фоиз, етказиб беришда 48 фоиз, такси ва ресторан хизматларида 46 фоиз ҳамда юк ташиш соҳасида 14 фоизгача кўтарилган.
10 ой давомида 113 минг нафардан зиёд ўзбекистонликлар ривожланган мамлакатларга расмий ишлаш учун юборилган (2023 йил мос давридагидан 3,6 баробар кўп).
Ўтган йил шу давридагига қараганда АҚШдан Ўзбекистонга пул ўтказмалари 37 фоизга ошган. Ўз навбатида Жанубий Кореядан 71 фоизга, Буюк Британиядан 76 фоизга, Европадан 41 фоизга ўсиш кузатилган.
“10 ой ичида жисмоний шахсларга келиб тушган маблағларнинг 7 миллиард доллари анъанавий халқаро пул ўтказма тизимларидан (йиллик ўсиш 19 фоиз) амалга оширилган”, дейилади Марказий банк таҳлилида.
Қолган 4,9 миллиард доллари фуқаролар банк карталарига тўғридан-тўғри (ўсиш 52 фоиз) ҳамда 650 миллион доллари банк ўтказмаси (SWIFT) орқали (ўсиш 2,4 баробар) келиб тушган.
Изоҳ (0)