Коронавирус юқори эҳтимол билан лабораториядан сизиб чиқиши оқибатида тарқалган. АҚШ конгрессменлари икки йиллик текширув натижаларини бўйича ҳисобот берди.
Ҳужжат Вакиллар палатаси Назорат қўмитасининг коронавирус бўйича кичик қўмитаси томонидан тақдим этилган. Унда “COVID-19 вируси катта эҳтимол билан Хитойнинг Ухан шаҳридаги лабораториядан келиб чиққани” таъкидланган. Ҳужжат муаллифлари буни исботлаш учун бешта далил келтирган.
Унга кўра, вирус табиатда аниқланмаган биологик хусусиятларга эга, COVID-19 нинг барча ҳолатларида вирус инсон организмига бир марта кириши натижасида юзага келган. Гарчи олдинги пандемияларда бир нечта тарқалиш манбалари кузатилган.
Бундан ташқари, Уханда SARS вирусларини ўрганиш бўйича етакчи тадқиқот лабораторияси мавжуд. Конгрессменлар муассаса “биологик хавфсизлик даражаси етарли бўлмаган” тадқиқотлар тарихига эгалигини айтмоқда.
Ухан вирусология институти тадқиқотчилари 2019 йил кузида, COVID-19 ёввойи ҳайвонлар бозорида аниқланишидан бир неча ой олдин, COVIDга ўхшаш вирус билан касалланган. Илм-фаннинг барча мезонларига кўра, агар табиий келиб чиқиш ҳақидаги далиллар мавжуд бўлганда, улар аллақачон маълум бўлар эди, дейилади хулосада.
Олимлар эса коронавирус бозордан тарқалганини айтмоқда
АҚШ, Буюк Британия, Франция ва бошқа мамлакатлардан бир гуруҳ олимлар коронавирус тарқалишининг манбайи Хитойнинг Ухан шаҳридаги денгиз маҳсулотлари бозори эканини айтганди. 12 миллиондан ортиқ аҳолига эга Уханда 4 та тирик ҳайвонлар бозори фаолият юритади. Улар орасида Хуанан бозори энг кўп ёввойи ҳайвонлар сотиладиган жой ҳисобланади.
Олимлар бозорда 2019 йилнинг кузида бир неча еноцимон итлар, бамбук каламушлар, малай жайралари, Амур типратиканлари ва Осиё бўрсиқлари каби тирик ҳайвонларни ноқонуний сотилганини айтмоқда. Ёввойи ҳайвон сотувчиларнинг аксарияти бозорнинг ғарбий қисмида жойлашган, айнан шу ерда COVID-19 билан касалланишнинг энг дастлабки ва кўп ҳолатлари кузатилган.
Бозордан олинган генетик материал намуналари пандемиянинг умумий аждодига генетик жиҳатдан мос келган. Коронавирус излари ҳайвонлар сақланадиган қафасларда, уларни ташилган араваларда ва канализация каналларида топилган. ЖССТ 2021 йилдаги ҳисоботида айнан шу ҳайвонлар COVID-19 тарқалишининг энг эҳтимолий манбаларидан бири бўлиши мумкинлигини таъкидлаганди.
Изоҳ (0)