Буюк Британия парламентининг қуйи палатаси “Бедаво касалликка чалинган катталар (ҳаётини якунлаш)” тўғрисидаги қонун лойиҳасини иккинчи ўқишда кўриб чиқди ва уни кўпчилик овоз билан қўллаб-қувватлади.
BBC хабарига кўра, мунозара беш соат давом этган, унда депутатлар шахсий ҳикоялари билан ўртоқлашган ва ҳаёт қандай тугаши кераклиги ҳақида ўз фикрларини билдирган. 330 нафар депутат эвтаназияни қонунийлаштиришни ёқлаган, 275 нафари қарши чиққан.
“Бедаво касаликка чалинган катталар (ҳаётини якунлаши)” тўғрисидаги қонун лойиҳаси Англия ва Уэлсдаги мазкур турдаги касалликка чалинган 18 ва ундан катта ёшдагилар ўз ҳаётини ихтиёрий равишда тугатишда ёрдам сўраш ва ёрдам олиш имкониятини беради.
Қонун лойиҳасида эвтаназия қотилликнинг қонунийлаштирилган усулига айланиб қолмаслиги учун бир қатор кафолатлар назарда тутилган. Даволаб бўлмайдиган касалликка чалинган аниқ шахсга эвтаназияга рухсат бериш тўғрисидаги қарор икки мустақил шифокор ва судьядан иборат кенгаш томонидан қабул қилинади. Бунда беморнинг умр кўриш прогнози олти ойдан ошмаслиги, у ўз ҳаётини тугатиш истагини аниқ баён қилиши, қариндошлари ёки бошқа шахслар томонидан мажбурлаш бўлмаслиги керак.
Яқинда Буюк Британияда эвтаназияни қонунийлаштириш бўйича ўтказилган ижтимоий сўровнома британияликларнинг 65 фоизи бу қадамни қўллаб-қувватлашини кўрсатди. Бор-йўғи 13 фоиз британиялик эвтаназияни қонунийлаштиришга қарши чиққан.
Энди қонун лойиҳаси қуйи палата қўмиталари муҳокамасига қўйилади ва учинчи ўқишдан сўнг Лордлар палатаси кўриб чиқиши учун тақдим этилади. Ушбу жараён бир неча ой давом этиши кутилмоқда ва қонуннинг якуний қабул қилиниши кейинги ёзгача амалга оширилмайди.
Эвтаназия қуйидаги шаклларга бўлинади:
- Фаол эвтаназия – шифокор беморнинг ўлимини тезлаштириш учун бевосита ҳаракат қилиши, масалан, махсус дори воситаларини қўллаши.
- Пассив эвтаназия – беморни ҳаётда ушлаб турувчи муолажаларни тўхтатиш, масалан, сунъий нафас олиш ускунасини ўчириш.
Эвтаназия кўплаб мамлакатларда ноқонуний ҳисобланади, аммо айрим давлатларда (Нидерландия, Бельгия, Канада, Швейцария) маълум шароитларда қонунийлаштирилган.
Изоҳ (0)