Шимолий Корея шарқий сувлари томон узоқ масофали баллистик ракета учирди. Бу ҳақда Жанубий Корея штаб бошлиқлари бирлашган қўмитаси маълум қилди.
Ҳарбий баёнотда ракета Шимолий Кореядан “юқори бурчак остида” учирилгани тахмин қилинган.
Япония қирғоқ қўриқлаш хизмати ракета КХДРдан учирилганини тасдиқлаган ва у баллистик бўлиши мумкинлигини ҳам айтган. Мамлакат мудофаа вазири Ген Накатани ракета КХДР тарихидаги “энг узоқ парвоз вақти”га эга эканини таъкидлаган ва “у оддий ракеталардан фарқ қилиши мумкинлигини” қўшимча қилган.
Оқ уй Миллий хавфсизлик кенгаши матбуот котиби Шон Саветтнинг айтишича, Қўшма Штатлар Шимолий Кореянинг “қитъалараро баллистик ракета синовини” қатъий қоралайди. Унинг қўшимча қилишича, учириш “БМТ Хавфсизлик кенгашининг кўплаб резолюцияларини очиқдан очиқ бузишдир”.
“Биз барча мамлакатларни ушбу қонунбузарликларни қоралашга, КХДРни беқарорлаштирувчи ҳаракатларини тўхтатишга ва жиддий мулоқотга киришишга чақирамиз”, дейилади Оқ уй баёнотида.
29 октябрь куни АҚШ Мудофаа вазирлиги матбуот котиби Патрик Райдер бир неча минг шимолий кореялик аскарлар Россиянинг Курск вилоятига қараб ҳаракатлангани ва уларнинг оз қисми аллақачон у ерга етиб борганини хабар қилганди.
Бунгача Пентагон жойлаштирилган кучлар сонини 10 минг киши деб ҳисоблаган эди.
“Биз Шимолий Корея 10 мингга яқин аскарини Россия шарқида машқ қилиш учун юборган, деб ҳисоблаймиз”, деди АҚШ Мудофаа вазирлиги матбуот котиби Сабрина Сингх Вашингтонда.
Изоҳ (0)