Шимолий Корея раҳбари Ким Чен Ин 28 декабрь, чоршанба куни ҳукмрон Корея Меҳнат партияси конференциясида 2023 йил учун мамлакат ҳарбий қудратини мустаҳкамлаш бўйича мақсадларни белгилаб берди.
Шимолий Кореянинг Марказий телеграф давлат ахборот агентлиги расмий баёнотида бу вазифаларнинг моҳияти ошкор қилинмаган, бироқ Ким Чен Ин Корея ярим оролидаги «янги мураккаб вазият» ҳамда кенгроқ геосиёсий ҳолатлар ҳақида умумий маълумот бергани таъкидланган.
«Ким Чен Ин ташқи сиёсат тамойиллари ва душманга қарши кураш йўналишини кўрсатиб берди. Партиямиз ва ҳукуматимиз суверен ҳуқуқларни ҳамда миллий манфаатларни ҳимоя қилиш учун уларга қатъий амал қилиши керак», — дейилади хабарда.
Агентлик, шунингдек, «ўз-ўзини мудофаа қилиш қобилиятини кучайтириш бўйича мақсадлар сиёсий вазиятнинг турли томонга тебранишига тайёргарлик доирасида» тақдим этилганини таъкидлади.
Ким Чен Иннинг учрашуви эртаси куни ҳам давом этиши қўшимча қилинди.
Шимолий Корея ракета ва дронлар учирмоқда
26 декабрь куни Жанубий Корея КХДР дронлари икки давлат ўртасидаги чегара чизиғини кесиб ўтганини даъво қилиб, қирувчи самолётлар ва жанговар вертолётларини ҳавога кўтарди. Шунингдек, бу Сеул аэропортларида фуқаролик рейсларининг вақтинчалик тўхтатилишига олиб келди. Дронларга қурол ортилгани аниқланмаган.
Бунгача Шимолий Корея дронлари 2014 ва 2017 йилларда Жанубий Корея билан чегаранинг жанубида қайд этилганди. Уларнинг парвозлари Жанубий Корея раҳбариятини ташвишга солмоқда, чунки дронлар ҳам разведка операциялари, ҳам зарбалар учун ишлатилиши мумкин.
18 декабрь куни Жанубий Корея ҳарбийлари Корея ярим оролининг шарқий қирғоғидан КХДР ҳудудидан Япон денгизи томон иккита баллистик ракета учирилгани ҳақида хабар берди. Ушбу турдаги ракеталар ядровий каллакларни олиб юриши ва Япониядаги нишонларга тегиши мумкин.
Reuters маълумотларига кўра, Шимолий Корея 2022 йилда ҳар қачонгидан ҳам кўпроқ ракета учирган, Пхеньян жорий йил бошидан бери 50 дан ортиқ ракета синовларини ўтказган.
Изоҳ (0)