Ким Чен Иннинг синглиси ва Шимолий Корея Меҳнат партияси марказий қўмитаси раҳбари ўринбосари Ким Ё Чжон КХДР ракеталари Жанубий Кореяга қаратилмаганини айтди. Бу ҳақда Корея марказий ахборот агентлиги хабар берди.
Унинг баёноти КХДР 18 февраль, шанба куни Япон денгизи томон баллистик ракета учирганидан сўнг эълон қилинди. Пхеньян ракета 67 дақиқада 989 километр учиб, денгизга қулагани, парвознинг максимал баландлиги 5,77 минг километрни ташкил қилганини таъкидлаган.
“Жанубий Корея ўзини жасур қилиб кўрсатиб, ҳозиргидек ҳамма нарсага бурнини суқмаслиги керак. Бундай хатти-ҳаракатлар қандай муаммога олиб келишини ўйлаб кўришлари яхшироқдир. Бизнинг баллистик ракеталаримиз ҳеч қачон Сеулни нишонга олмайди. Бизда ҳали ҳам Жанубий Корея билан шуғулланиш истаги йўқ”, — деди у.
Пхеняьннинг фикрича, Вашингтон ва Сеул ҳарбий устунликка эришиш ва “Корея ярим оролида ҳукмрон мавқе”ни эгаллашни мақсад қилган.
“Кундан кун, соатма-соат минтақадаги барқарорлик бузилади ва вазият янада оғирлашади”, — дея қўшимча қилди Ё Чжон.
У АҚШни “дунёни КХДРга душман эмасмиз ва мулоқотга тайёрмиз” деб алдашни бас қилишга чақирди. КХДРга кўра, бу музокаралар вақтни сотиб олишга қаратилган.
Изоҳ (0)