Жанубий Корея Шимолий Корея етакчиси Ким Чен Ин ва Россия президенти Владимир Путиннинг ҳарбий ҳамкорликни кенгайтиришга қаратилган учрашувидан “чуқур хавотир ва афсус” билдирди. Сеулдагиларнинг фикрича, икки яккаланиб қолган, аммо ядровий қуролга эга етакчилар АҚШ билан кескинлашиб бораётган зиддият фонида келишувга эришмоқда.
Вашингтон Ким ва Путин ўртасидаги саммит Москванинг Украинадаги уруши учун ўқ-дорилар етказиб бериш бўйича келишувга олиб келиши мумкинлигидан огоҳлантирди. Жанубий Корея эса Шимол снарядлар эвазига Россиядан илғор қурол технологиялари, жумладан, ҳарбий жосуслик сунъий йўлдошлари билан боғлиқ бўлган технологиялар олишидан, натижада Кимнинг ҳарбий ядровий дастури таҳдиди ошишидан жиддий хавотирда.
“Биз халқаро ҳамжамиятнинг такрор огоҳлантиришларига қарамай, Шимолий Корея ва Россия саммити чоғида ҳарбий ҳамкорлик масалалари, жумладан, сунъий йўлдошларни ривожлантириш масалаларини муҳокама қилганидан чуқур хавотир ва афсусдамиз”, — деди Жанубий Корея Ташқи ишлар вазирлиги матбуот котиби Лим Су Сок.
Ядро қуроллари ва ракеталарни ривожлантиришга ҳисса қўшадиган ҳар қандай фан ва технология, шу жумладан, баллистик ракета технологияларини ўз ичига олган сунъий йўлдош тизимлари соҳасидаги ҳамкорлик БМТ Хавфсизлик Кенгаши резолюцияларига зиддир”.
Лим, шунингдек, Ким Чен Иннинг Россиядаги делегацияси таркибида БМТ Хавфсизлик Кенгаши санкциялари остига тушган бир неча шахслар борлигини айтди. Хусусан, Корея халқ армияси маршали Ри Пён Чол ва ўқ-дорилар сиёсати билан шуғулланувчи ҳукмрон партия расмийси Жо Чун Ён Шимолий Кореянинг ноқонуний қурол ишлаб чиқариш фаолиятида иштирок этгани учун “қора рўйхат”га киритилган.
Лимнинг айтишича, Москва Пхеньян билан ҳарбий ҳамкорликни давом эттирса, Сеул билан муносабатларга бунинг “жуда салбий таъсирини” тушуниши керак.
Жанубий Кореянинг Шимол билан бирлашиш вазири Ким Юн Ҳо Пхеньян ва Москва ўртасида потенциал қурол-яроғ алмашиш минтақавий хавфсизлик соҳасида уч томонлама ҳамкорликни кучайтираётган Жанубий Корея, АҚШ ва Япониядан янада кучли жавоб чораларига сабаб бўлиши ҳақида огоҳлантирди.
Оқ уй Миллий хавфсизлик кенгаши спикери Жон Кирби Шимолий Корея Россияга қурол етказиб берса, санкциялар қўлланишини айтди.
“Сайёрамиздаги ҳеч бир халқ, ҳеч ким жаноб Путинга бегуноҳ украиналикларни ўлдиришда ёрдам бермаслиги керак”, — деди Кирби.
Унинг сўзларига кўра, Шимолий Кореянинг ҳарбий салоҳиятини оширадиган ҳар қандай келишув “албатта, жиддий ташвиш уйғотади”.
Шимолий Кореянинг Корея давлат марказий ахборот агентлиги (KCNA) хабар беришича, Ким Чен Ин Путинни Шимолий Кореяга таклиф қилган, Путин эса “таклифни мамнуният билан қабул қилган”.
Путин саммитдан сўнг Россия давлат телевидениесига берган интервьюсида Ким Чен Иннинг ўзи Россиянинг Узоқ Шарқидаги яна икки шаҳарга ташриф буюришини, Комсомолск-Амурга учиб боришини, у ерда самолёт заводига ташриф буюришини, сўнгра Россиянинг Тинч океан флотини, университет ва бошқа иншоотларни кўриш учун Владивостокка боришини айтди.
13 сентябрдаги учрашувда Ким Чен Ин “империализмга қарши курашда” Россияни қўллаб-қувватлашини билдирди. У КХДР Путин ва унинг ҳукумати қарорларини доим қўллаб-қувватлаб келганига ишонтирди. Музокараларни айнан “Восточний” космодромида ўтказиш қарори Кимнинг ҳарбий разведка сунъий йўлдошларини ишлаб чиқишда Россиядан ёрдам сўраганини кўрсатади, дейди таҳлилчилар.
Путин журналистларга Россия ва Шимолий Кореянинг транспорт ва қишлоқ хўжалиги каби соҳаларда “кўплаб қизиқарли лойиҳалари” борлигини ва Москва ўз қўшнисига гуманитар ёрдам бераётганини айтди.
Аммо у ҳарбий ҳамкорлик ҳақида гапиришдан қочди, фақатгина Россия Пхеньян дан қурол сотиб олишни тақиқловчи санкцияларга риоя қилишини айтди.
Изоҳ (0)