КХДР Жанубий Кореяга «огоҳлантириш» сифатида 130 та артиллерия снаряди учирди

Шимолий Корея армияси денгиз буфер зонасига 130 та артиллерия снарядларини учирди. Бу ҳақда Al Jazeera хабар берди.

Маълум қилинишича, бунга Жанубий Корея ва АҚШнинг чегара яқинида ҳарбий машғулотлар ўтказаётгани сабаб бўлган. Артиллериядан маҳаллий вақт билан соат 15:00 дан 16:00 гача ўқ узилган. Айрим снарядлар буфер демилитаризация зонасига тушган. Сеул бу ҳарбий кескинликни пасайтириш чора-тадбирлари тўғрисидаги 2018 йил 19 сентябрдаги Кореялараро келишувни қўпол равишда бузиш эканини таъкидламоқда.

Шимолий Корея Марказий телеграф агентлиги (KCNA) маълумотларига кўра, КХДР артиллериясига жавобан Жанубий Корея қарши снарядлар учирган. «Бош штаб яна бир бор шуни маълум қиладики, душманнинг барча провокацион ҳаракатлари диққат билан кузатиб борилади ва уларга доимо қатъий жавоб берилади», — дейилади хабарда.

Эсалтиб ўтамиз, АҚШ, Япония ва Жанубий Корея Шимолий Кореяга қарши янги санкциялар киритди. Бу санкциялар Шимолий Кореянинг 18 ноябрда ўтказган халқаро баллистик ракеталар синови фонида жорий қилинмоқда. КХДР йил бошидан бери 60 дан ортиқ ракета синовларини ўтказди, бу эса унинг 2017 йилдан буён тўхтатиб қўйилган ядровий қурол синовларини қайта бошлаши мумкинлигидан хавотир уйғотмоқда.