31 май куни эрталаб Жанубий Корея Бирлашган штаб бошлиқлари қўмитаси Шимолий Корея жанубга томон ракета учирганини маълум қилди. Бу ҳақда DW хабар бермоқда.
Шу муносабат билан Сеулда ҳаво ҳужумидан огоҳлантириш эълон қилинди, Жанубий Корея пойтахти аҳолисидан эвакуацияга тайёр туриш ва биринчи навбатда “болалар ва қарияларни хавфсиз жойларга етказиш” сўралган. Бир оз вақт ўтгач, мамлакат Ички ишлар вазирлиги шаҳар ҳокимияти томонидан юборилган огоҳлантириш “нотўғри ташкил этилган”ини билдирди.
31 май куни эрталаб Япония жанубида ҳам ҳаво тревогаси эълон қилинди. “Шимолий Корея баллистик ракета учиргани тахмин қилинмоқда. У Окинава префектураси ҳудудига тушиши мумкин. Илтимос, бинолар ичида ёки ер остидаги хавфсиз бошпаналарга ўтинг”, — дейилади Япония миллий туризм ташкилоти томонидан эълон қилинган огоҳлантирувчи баёнотда.
Пхеньян ракета денгизга қулаганини тасдиқлади
Маҳаллий вақт билан соат 07:05 да (Тошкент вақти билан 03:05) Япония қирғоқ қўриқлаш хизмати Шимолий Корея томонидан учирилган баллистик ракета “қулаб тушганга ўхшайди” деб хабар берди. Қурбонлар ва вайронагарчиликлар ҳақида ҳеч нарса айтилмаган.
Бу ракетанинг икки босқичи бир-биридан ажралган вақтда содир бўлди, олимлар сабабини ўрганишмоқда, деб хабар берди Шимолий Кореянинг Корея марказий телеграф давлат агентлиги. КХДР космик агентлиги синовни имкон қадар тезроқ қайта бошлаш ниятида, деб ёзади Япониянинг Choson Sinbo газетаси. Пхеньян ракета турини “ракета ташувчи” деб атамоқда.
Аввалроқ Шимолий Корея яқин ҳафталарда сунъий йўлдош учириши ҳақида Японияга билдириш юборган эди. Пхеньян Токиони сунъий йўлдошни 31 май—11 июнь оралиғида учириш режаларидан хабардор қилган.
Япония ва Жанубий Корея ҳукуматлари Бирлашган Миллатлар Ташкилотининг ҳар қандай ракета синовларини тақиқлаш ҳақидаги резолюциясига ишора қилиб, Шимолий Корея расмийларидан сунъий йўлдошни учириш режаларидан воз кечишни талаб қилди.
Хусусан, Токио аппаратни йўқ қилиш билан таҳдид қилди, чунки Пхеньян томонидан ҳар қандай ракета учирилиши Япония ҳудудлари учун хавф туғдиради.
Изоҳ (0)