Ўз ҳудудида уриб туширилган Жанубий Кореяга тегишли дрон топилганини даъво қилгандан сўнг, Шимолий Корея Сеулни “жиддий ҳарбий провокация”да айблади.
“КХДР Мудофаа вазирлиги вакили кейинги сафар мамлакат ҳудудини ҳарбий йўл билан бузиш “уруш эълон қилиш” сифатида баҳоланиши ва “зудлик билан жавоб зарбаси”га олиб келиши билан таҳдид қилди”, дейилади Корея марказий телеграф агентлиги хабарида.
Шимолий Корея расмийларига кўра, 13 октябрь куни Пхеньянда ҳалокатга учраган Жанубий Корея ҳарбий дрони бўлаклари топилган. Махсус тузилган тергов гуруҳи Пхеньян марказига варақалар тарқатган айнан мана шу дрон бўлган, деб тахмин қилмоқда, аммо якуний хулоса ҳали чиқарилмаган.
Пхеньян маълумотларига кўра, октябрь ойида Жанубий Кореядан тарғибот варақаларидан иборат дронлар мамлакат пойтахтига уч марта яқинлашган. Жанубий Корея мудофаа вазири Ким Ён Хён ушбу маълумотни “тасдиқлай олмаслигини” айтган.
Корея яриморолидаги кескинлик охирги пайтларда сезиларли даражада ошиб бормоқда. 15 октябрь куни Шимолий Корея бир пайтлар Кореялараро ҳамкорлик рамзи ҳисобланган Жанубий Кореяга олиб борувчи йўлларни портлатиб юборган эди.
Сеул маълумотларига кўра, Шимолий Корея 2024 йил бошидан буён чегарада танкка қарши янги тўсиқлар қуриб, миналар ўрнатмоқда.
Кейинроқ Пхеньян мамлакатнинг янги конституцияси Жанубий Кореяни расман “душман давлат” сифатида белгилашини тасдиқлаган. Шунингдек, Шимолий Корея Жанубий Корея билан бирлашиш ғоясидан расман воз кечган.
Изоҳ (0)