Шимолий Корея 20 февраль куни Япон денгизи томонга иккита қисқа масофали баллистик ракета учирди, деб хабар бермоқда Yonhap ахборот агентлиги Жанубий Корея ҳарбийларига таяниб.
Жанубий Корея Қуролли кучлари штаб бошлиқлари бирлашган қўмитаси Жанубий Пхенян провинциясидаги Сукчхон ҳудудидан эрталаб соат 7:00—7:11 (Тошкент вақти билан 3:00 ва 3:11) оралиғида иккита қисқа масофали ракета учирилганини қайд этди.
Биринчи ракета 100 километр баландликда учган, парвоз масофаси тахминан 400 километр бўлган. Иккинчи ракетанинг парвоз баландлиги 50 километрни, масофаси тахминан 350 километрни ташкил қилган.
Япония Шимолий Кореянинг Япон денгизига ракета учириши ортидан Бирлашган Миллатлар Ташкилоти Хавфсизлик Кенгашининг фавқулодда йиғилишини талаб қилди.
БМТ бош котиби Антониу Гутерриш Шимолий Корея томонидан баллистик ракеталар учирилишини қоралади ва Пхенянни провокацион қадамлардан тийилишга чақирди.
“Бош котиб КХДР томонидан навбатдаги қитъалараро узоқликдаги баллистик ракета учирилишини кескин қоралайди”, — деди бош котиб матбуот котиби Стефан Дюжаррик БМТ веб-сайтидаги изоҳида.
Қайд этилишича, Гутерриш Пхенянни “ҳар қандай бошқа провокацион ҳаракатлардан зудлик билан тийилишга, БМТ Хавфсизлик Кенгашининг барча тегишли резолюциялари бўйича ўз халқаро мажбуриятларини тўлиқ бажаришга ва Корея яриморолида барқарор тинчлик, тўлиқ ядросизланишга олиб келадиган мулоқотни тиклашга” чақирмоқда.
Шимолий Корея АҚШ ва Жанубий Кореянинг қўшма ҳарбий машғулотлари фонида баллистик ракеталар учирмоқда. 18 февраль куни Пхенян “Хвасон-15” ракетасини учирганди, Япония мудофаа вазирлигига кўра, бу ракетда АҚШ ҳудудга етиб боришга қодир. Бир кун ўтиб Вашингтон ва Сеул қўшма машғулотлар ҳақида эълон қилди.
Шимолий Корея томони бу манёврларга “қатъий жавоб” ваъда қилди. Шимолий Корея етакчисининг синглиси ва Меҳнат партияси Марказий қўмитаси бўлим бошлиғи ўринбосари Ким Ё Чжон АҚШнинг ҳаракатларига жавобан Тинч океани томон ракета учиришлар сонини кўпайтириш билан таҳдид қилди.
Изоҳ (0)