Жанубий Корея разведкаси маълумотларига кўра, 12 мингга яқин Шимолий Корея аскари Украинадаги урушда қатнашиш учун Россиянинг шарқий ҳудудларида тайёргарликдан ўтмоқда. Бу ҳақда Yonhap агентлиги Жанубий Корея разведкасига таяниб хабар берди.
Қайд этилишича, КХДР техник ходимлари ҳозирданоқ россиялик ҳарбий хизматчиларга ракета учирувчи қурилмаларга хизмат кўрсатишда ёрдам бермоқда.
Аввалроқ Украина Мудофаа вазирлиги Шимолий Корея аскарлари 1 ноябрданоқ жанговар ҳаракатларда қатнашишга тайёр бўлишини маълум қилганди. Вазирлик вакилига кўра, КХДР пиёда қўшинлари Россия техника ва ўқ-дориларидан фойдаланади.
2600 нафар аскардан иборат биринчи бўлинма Курск вилоятига юборилиши кутилмоқда. Шимолий Корея қўшинларининг қолган қисми қаерга кетиши номаълум.
Аввалроқ Украина президенти Владимир Зеленский Брюсселдаги матбуот анжуманида КХДР Украинага қарши урушда қатнашиш учун ҳарбийларнинг турли бўлинмаларидан жами 10 минг нафар аскарини юборишни режалаштираётганини маълум қилган.
Жанубий Корея президенти Юн Сук Ёл асосий разведка, ҳарбий ва миллий хавфсизлик вакиллари иштирокида Шимолий Корея қўшинларининг урушдаги иштирокини муҳокама қилиш учун фавқулодда хавфсизлик йиғилиши ўтказган. Президент идораси баёнотида айтилишича, Шимолий Кореянинг Россияга қўшин юбориши нафақат Жанубий Корея, балки бутун халқаро ҳамжамият учун жиддий хавфсизликка таҳдид солади ва Сеул “бу ҳаракатга барча мавжуд воситалар билан жавоб беради”.
Октябрь ойи бошида Украина Миллий хавфсизлик ва мудофаа кенгашининг дезинформацияга қарши кураш маркази Донецк вилоятидаги КХДР ҳарбийлари Россияга ўтказилган ўқ-дорилар ҳолатини кузатаётганини маълум қилганди.
Изоҳ (0)