Шимолий Корея Япон денгизи томон яна баллистик ракета учирди, деб хабар бермоқда NHK Япония мудофаа вазирлигига таяниб.
Ракета Япония иқтисодий зонасидан ташқарида, Корея ярим оролидан 550 километр шарқда қулаган.
Бу КХДР томонидан тўрт кун ичида тўртинчи ракета учирилиши. 15 мартга ўтар кечаси Шимолий Корея ўрта масофага мўлжалланган иккита “ер-ер” баллистик ракетасини учирганди.
13 мартга ўтар кечаси Шимолий Корея ҳарбийлари сувости кемасидан икки қанотли ракетани, 14 март тонгида эса Япон денгизи томон иккита қисқа масофали баллистик ракеталарни учирган.
Шимолий Корея ракеталарининг синови 13 мартда бошланган Сеул ва Вашингтон қўшма машғулотлари фонида амалга оширилмоқда. Пхенян қўшма машғулотларни ўзига қарши “агрессив урушга тайёргарлик” деб баҳолаган.
Март ойи бошида Шимолий Корея етакчисининг синглиси Ким Ё Чжон агар АҚШ Шимолий Кореянинг Тинч океанида синовдан ўтказадиган қитъалараро ракетасини уриб туширишга уринса, Пхенян буни уруш эълон қилиниши деб баҳолашини айтганди. Шунингдек, Шимолий Корея ташқи ишлар вазирининг халқаро ташкилот бўйича ўринбосари Ким Сон Ген БМТни АҚШ ва Жанубий Кореядан қўшма ҳарбий машғулотларни тўхтатишни талаб қилишга чақирган.
Изоҳ (0)