КХДР етакчиси Ким Чен Иннинг синглиси, Корея Меҳнат партияси Марказий қўмитаси бўлим мудири ўринбосари Ким Ё Чжон КХДР сунъий йўлдошлари синовлари натижалари мамлакатнинг технологик салоҳияти юқори эмаслигидан дарак беришини даъво қилаётган чет эллик экспертларни танқид қилди.
Аввалроқ КХДР разведкачи сунъий йўлдошни орбитага чиқариш бўйича синовларнинг якуний босқичини амалга ошириб, Сеул ва Incҳхон порт шаҳрининг фазодан олинган тасвирларини эълон қилган эди.
Ким Ё Чжон Корея Марказий телеграф агентлиги томонидан тарқатилган баёнотида айтишича, хориж, шу жумладан, Жанубий Корея мутахассисларининг Сеул ва Incҳхон тасвирлари сунъий йўлдошдан олинган суратлар учун ўта паст сифатга эга экани ҳақидаги фикрларига қўшилмайди.
«Тажрибавий камера орқали олинган ва газетада босиб чиқарилган иккита фотосуратга қараб бизнинг сунъий йўлдош ишлаб чиқариш ва уни тайёрлаш бўйича имкониятларимиз ҳақида қарор чиқариш ўринсиз ва шошма-шошарлик бўлади, деб ўйламадингиз», — деди Ким Ё Чжон.
Шимолий Корея етакчисининг синглиси қайд этишича, КХДР қитъалараро баллистик ракеталар қайтадан атмосферага кириши учун зарур бўлган технологияларга эга. «Буни тезда ўзингиз кўрасиз ва тушуниб оласиз», — дея қўшиб қўйди у.
Синовлар 18 декабрь куни амалга оширилганди. Синов қурилмаси ортилган элтувчи ракета қарийб 500 км баландликка учирилган эди. Қурилма маълумотлар узатиш учун камералар ва зарур ускуналар билан жиҳозланганди. КХДРнинг коинотни ўзлаштириш бўйича давлат бошқармаси баёнотига кўра, Пхеньян ўзининг илк ҳарбий разведкачи сунъий йўлдошини ишлаб чиқишни 2023 йил апрелигача якунламоқчи.
Изоҳ (0)