Шимолий Корея Японияни сунъий йўлдош учириши ҳақида огоҳлантирди. Бу ҳақда Япония қирғоқ қўриқлаш хизматига таяниб, Deutsche Welle хабар берди.
-3GBMHk2h.jpg)
КХДР билдиришномасида Корея яримороли ва Филиппиннинг Лусон ороли яқинидаги денгизда ракета ташувчиси қолдиқлари тушиши мумкин бўлган учта хавфли зона аниқланди, — дейилади хабарда.
Аввалроқ Жанубий Корея расмийлари КХДР ўзининг иккинчи ҳарбий жосуслик сунъий йўлдошини орбитага чиқариш ниятида экани ҳақида маълум қилган эди. Сеулга кўра, Россия Шимолий Кореянинг Украинага қарши урушда Москвага кўрсатган ёрдамига жавобан ушбу сунъий йўлдошни учиришга ёрдам беради.
Жанубий Кореянинг юқори мартабали расмийси Россиядан кўплаб мутахассислар КХДРга жосуслик сунъий йўлдошларини учиришда ёрдам бериш учун келганини айтган. КХДР сўнгги бор ноябрь ойида айғоқчи сунъий йўлдошни учирган ва 2024 йилда орбитага яна учта шундай қурилмани чиқаришга ваъда берган.
2022 йил сентябрида КХДР кўп сонли санкциялар ва БМТ резолюцияларига зид равишда, “душман кучлар” томонидан ҳужум таҳдиди юзага келган тақдирда профилактик зарбалар беришга рухсат берувчи ядро қуроли тўғрисидаги қонунни қабул қилиб, ўзини расман ядровий давлат деб эълон қилган.
2024 йилнинг март ойида Жанубий Корея ва АҚШ 2018 йилдан бери биринчи марта КХДР томонидан юзага келиши мумкин бўлган ядровий таҳдидга қарши курашиш мақсадида кенг кўламли ҳарбий машғулотлар ўтказган.
Ҳарбий таҳлилчиларга кўра, Шимолий Кореянинг жосуслик сунъий йўлдошларини учириши, Пхеньянга ўзининг потенциал рақиблари ҳақида ҳарбий маълумот тўплаш имконини беради.
Изоҳ (0)