Шимолий Корея Пхенян наздида республикага “очиқ-ойдин душман” бўлган АҚШ ва Жанубий Кореядан эҳтимолий таҳдидларга худди шундай тарзда жавоб беришга тайёр. Бу ҳақда Шимолий Корея етакчиси Ким Чен Ин маълум қилди, деб хабар бермоқда “Корея Овози” радиостанцияси.
Кимнинг фикрича, Сеул ва Вашингтон Корея яримороли минтақасида ўтказилаётган “кенг кўламли ҳарбий машғулотлар — мулоҳазасизлик” эканини англаши керак. Ким Чен Ин бу манёврларни КХДРга қарши ҳарбий провокация деб атади.
Шимолий Корея етакчиси, шунингдек, Корея Меҳнат партиясининг баёнотини келтириб ўтди, унга кўра, Пхенян “ядровий қуролга ядровий қурол билан жавоб беради, очиқ қаршиликка очиқ қаршилик қилади”.
“Шимолий Корея ўз стратегик кучларини тезкор жавоб қайтаришга шай ҳолатда ушлаб туради”, — дея қўшимча қилди у.
Ким Чен Ин 16 март куни КХДР Япон денгизига бир ҳафтада тўртинчи бор ракета учирганини тасдиқлади. Унга кўра, “Хвасон-17” қитъалараро баллистик ракетаси синовлари АҚШ ва Жанубий Кореянинг ҳарбий машғулотларига жавобан ўтказилган.
13 март куни Жанубий Корея ва Қўшма Штатлар Фреедом Шиэлд қўшма машғулотларини бошлади, улар Жангчи қалқони дала манёврлари билан бирга ўтказилади. Машқлар 23 мартгача давом этади. Сеул ва Вашингтон Шимолий Корея томонидан эҳтимолий ҳужумни қайтариш учун сценарийларни ишлаб чиқмоқда, бунда “шимолдан бўлаётган ядровий ва ракета таҳдидлари” ҳисобга олинади. Пентагон вакили, генерал Пет Райдернинг сўзларига кўра, манёврлар фақат мудофаа характерига эга ва “минтақадаги потенсиал тажовузни олдини олиш учун мўлжалланган”, деб ёзади Yonhap.
КХДР эса бундай манёврларни “агрессив урушга тайёргарлик” сифатида қабул қилмоқда. Февраль ойида Шимолий Корея Ташқи ишлар вазирлиги Жанубий Корея ва АҚШни таҳдидлар юзага келган тақдирда Пхенян томонидан “мисли кўрилмаган ва кучли” жавоб берилиши ҳақида огоҳлантирган эди.
Изоҳ (0)