Кимдир шуҳрат қозониш, катта гонорар олиш, журналларда суратга тушиш ва блокбастерларда рол ўйнашни орзу қилар экан, қуйидаги машҳурлар аллақачон юлдузлик ҳаётидан тўйиб бўлишган. Шовқин-суронли Голливуд шунчалик жонига тегганки, улар қизил гиламлар ва тиғиз иш жадвалидан воз кечишга қарор қилишди. Энди улар учун оила, фарзандлар ва шахсий ҳаёт биринчи ўринда.
Кемерон Диас
Кемерон Диас 2025 йил бошида “Яна ишга” комедик жангари фильмида бош рол билан экранга қайтади. Бу сўнгги ўн йилда унинг иштирокидаги биринчи лойиҳа ҳисобланади. 2018 йилда у кинодан кетишга қарор қилиб, оиласи билан кўпроқ вақт ўтказишни истаганини айтганди. Диаснинг ижтимоий тармоқларидаги профили энди унинг юлдуз эмас, балки уй бекаси эканлигини кўрсатади. Профил тавсифида биринчи ўринда “она”, иккинчи ўринда эса “актриса” деб ёзилган.
“Кинода суратга тушаётганда, сенинг устингдан тўла эгалик қилишади. Суратга олиш майдончасида кунига 12 соатлаб бир неча ой ишлайсан. Бошқа нарсаларга вақт қолмайди. Мен ҳаётимнинг бир қисмини бошқа одамларга бераётганимни англадим. Улар уни олиб қўйишмоқда. Шунчаки ҳаётимни қайтариб олишим, ҳаётим учун масъулиятни ўз зиммамга олишим керак эди”, дея тушунтирган эди Кемерон.
Женнифер Лоуренс
Яқинда Женнифер Лоуренс иккинчи фарзандига ҳомиладор экани маълум бўлди. Эҳтимол, у яна танаффус олиб, бор вақтини фарзандига бағишлар. Эслатиб ўтамиз, Женнифер 2019 йилда галерея эгаси Кук Марони билан турмуш қурган ва 2022 йилда улар илк фарзанди Сайнинг ота-онаси бўлишган. Бу давр мобайнида Лоуренс атиги учта лойиҳада иштирок этган. Афтидан, юлдуз учун ҳозир оиласи ва туғилажак фарзанди биринчи ўринда. Аммо Женнифер машҳурлиги ҳақида қайғурмаса ҳам бўлади. У аллақачон шундай муваффақият ва оммага эга бўлдики, уни эсдан чиқариш қийин.
Рианна
Хонанда мусиқий фаолиятини тугатганини эълон қилмаган бўлса-да, мухлислари ундан янги мусиқалар кутишдан аллақачон умид узишган. 2016 йилда Рианна ўзининг саккизинчи студиявий альбоми Аnti’ни чиқарди, бу ҳозирча унинг охирги альбоми. Узоқ танаффус юлдузнинг шахсий ҳаёти билан боғлиқ. 2022 йил май ойида Рианна биринчи фарзандини дунёга келтирди, 2023 йилнинг августида эса яна она бўлди. Шунга қарамай, юлдуз бутунлай омма эътиборидан четда қолмади. Рианна фаол равишда бизнес билан шуғулланмоқда. Унга тегишли Sаvagе Х Fenty ички кийим бренди ва Fenty Beauty косметика бренди бор. Шунингдек, юлдуз ҳали ҳам журналлар учун суратга тушишда давом этмоқда, лекин деярли барча фотосессиялар энди оиласи билан, жумладан, фарзандлари ва севгилиси А$AP Rocky билан бирга. Интервьюлар мавзуси ҳам асосан шахсий ҳаёти ва оналик ҳақида.
Рианна июнь ойида, аслида бу вақт давомида мусиқани унутмаганини ва янги альбом устида узоқ ишлаганини маълум қилди. Яқин орада альбомни чиқаришга ваъда берди.
Унинг шижоатини инобатга олсак, альбом бу йил чиқиши мумкин. Лекин ҳар бир детални синчковлик билан кўриб чиқаётганини ҳисобга олсак, аниқ бир сана ҳақида гапиришга ҳали эрта.
Ева Мендес
Ева Мендеснинг ҳолати ҳам шунга ўхшаш. Унинг иштирокидаги сўнгги лойиҳа — 2014 йилда чиққан “Қандай қилиб махлуқни тутиш мумкин” номли фантастик детектив. Шундан бери актриса экранларда кўринмаяпти — бу қарорини оиласига бағишланишни хоҳлагани билан изоҳлаган эди.
Ева Райан Гослинг билан турмуш қурган ва улар бирга икки қизни тарбиялашмоқда. Бундай машҳур ва муваффақиятли турмуш ўртоғидан ўзиб кетиш қийин, шунинг учун Мендес карьерасини давом эттириш имконини Гослингга тақдим этган кўринади. Айтишича, у аллақачон ўзининг карьера чўққисига эришганини ҳис қилган. Сўнгги маълумотларга кўра, Ева ҳозирча актрисалик фаолиятига қайтишни режалаштирмаяпти. У болаларини тарбиялаш ва уй-рўзғор ишлари билан шуғулланишни афзал кўрмоқда.
Изоҳ (0)