Голливуднинг энг маҳоратли актрисаларидан бири Жулия Робертс 2021 йил 28 октябрь куни 53 ёшни қарши олди.
Жулия Робертс ҳозир дунёдаги энг машҳур ва бадавлат актрисалардан бири ҳисобланади. Кўплаб кино мукофотлар ва совринларга эришган актриса ўз мухлисларини янги картиналардаги ижроси билан хурсанд қилишда давом этмоқда. Қуйида актрисанинг ҳаёти ва ижоди ҳақидаги энг қизиқарли маълумотларни эътиборингизга ҳавола этамиз.
Болалик
Жулия Робертс 1967 йил АҚШнинг жануби-шарқида жойлашган Смирна номли кичик шаҳарчада туғилган. Унинг оиласи ижодкорлардан иборат бўлиб, онаси ва отаси театрда танишган. Кейинчалик, эр-хотин ёш истеъдодлар учун актёрлик мактабини ташкил этган.
Бундан ташқари, оилада яна икки фарзанд бўлиб, Жулиянинг опаси ва акаси бор эди. Уларнинг томирларида Ирландия, Шотландия, Германия, Швеция, Англия ва Уэльсдан келган муҳожирларнинг қони оқади.
Оилавий муаммолар
Бўлажак актрисанинг оиласида молиявий аҳвол ачинарли даражада эди. Шу сабабли рўй берадиган доимий жанжаллар ажримга олиб келди, муносабатлар 1971 йилда тамоман якун топди. Тез орада Жулининг онаси яна турмушга чиқди, унинг янги турмуш ўртоғи Майкл Моутс исмли одам эди. Бир мунча вақт ўтгач, бўлажак юлдузнинг Нэнси исмли синглиси дунёга келди.
Ўгай ота золим бўлиб, кўпинча болалари ва хотинини калтаклади. Уйда жисмоний зўравонлик муҳити ҳукм сурди. Жулининг онаси иккинчи никоҳи катта хато эканлигини тушунди. Актрисанинг ўзи эса бу мавзу ҳақида гапиришни хоҳламайди. Бўлажак юлдуз отасининг тақдири фожиали тарзда якун топди. У яна бошқа аёлга уйланди, аммо жиддий касаллик оқибатида тўсатдан вафот этди.
Фаоллик даври
Жулия бир нечта машҳур таълим муассасалари – Гриффин ўрта мактаби ва Кемпбелл коллежида ўқиган. Гарчи у ўн уч ёшидан бошлаб таълимни кичик пицца марказидаги иш билан олиб боришга мажбур бўлган бўлса-да, у жуда яхши баҳоларга ўқиган.
Энг қизиғи, Жули биология фанини яхши кўрарди, у ҳатто шу соҳада ўқишни ва ветеринар бўлишни хоҳлаган. Унинг севимли машғулоти кларнет чалиш бўлган, шунингдек, актриса турли танловларда ва кичик ҳаваскор театр томошаларида қатнашган.
Янги ҳаётнинг бошланиши
Жули ўқишни тугатгандан сўнг ишсиз юришни хоҳламади. Омадини излаб, опаси яшаётган Нью-Йоркка кўчиб ўтди. Робертс машҳур актриса бўлишга ва орзусини рўёбга чиқаришга қарор қилди. Нью-Йоркда Click моделлик агентлиги вакиллари ундаги истеъдодни пайқаб қолди. Шундан сўнг Жулия турли реклама компанияларида фаол иштирок эта бошлади ва актёрлик маҳоратини ошириш учун курсларда қатнашди.
Фильмга тайёргарлик
Нью-Йоркда Робертс ўз маҳоратини ошириш учун қўлидан келганича ҳаракат қилди. У жанубийликларга хос нутқини тузатишга ҳаракат қилиб, талаффузи устида қаттиқ ишлади. Шунингдек, ҳеч қачон ихтисослаштирилган курсларни тугатмаган, чунки уларни самарасиз деб ҳисоблаган.
Актриса биринчи ролини ижро этгач, ота-онаси қўйган Жули исмини ўзгартирмоқчи бўлди. У буни АҚШ Актёрлар гильдиясининг аъзоси бўлган пайтда амалга оширди. Жули шундай қадам ташлаши керак бўлган, чунки унинг исми аллақачон уюшмада рўйхатга олинганди.
Карьера
Қиз биринчи марта 1988 йилда «Мамнуният» номли мусиқий фильмда иштирок этиб, актриса сифатида кенг омма олдида пайдо бўлди. У кичик рок гуруҳи аъзоси — ёш гитарачи ролини жуда яхши ўйнади.
Унинг биринчи ижроси «Қон каби қизил» картинаси эканлиги кўпчиликка номаълум. Ушбу фильмда Жулияни бир неча сониягина кўриш мумкин. Фақат мазкур картина «Мамнуният»дан кейин омма эътиборига ҳавола этилган.
Робертс учун уч бош қаҳрамондан бирини ижро этган «Мистик пицца» трагикомедияси бироз қийинчиликлар туғдирди. У ҳатто сочларини қизил рангга бўяшга мажбур бўлди! Актрисанинг фильм учун гонорари 50 минг долларни ташкил қилган. Бундан ташқари, фильм машҳур Мэтт Деймон учун ҳам дебют эди.
Муваффақият сари
Жулиянинг карьерасига унинг касаллиги катта таъсир кўрсатди. Менингит туфайли у яшаш жойини ўзгартиришга мажбур бўлди. Касаллик уни илиқ об-ҳаволи Лос-Анжелесга, яъни Санта-Моникага олиб борди.
Ғарбий соҳилда у кастингларда фаол иштирок эта бошлади ва тез орада «Темир гуллар» лойиҳасининг бир қисми бўлишга таклиф қилинди. Фильм кассада яхши фойда кўрди, харажатлар ортиғи билан қопланди. Картинада Робертс қандли диабет билан касалланган қиз ролини ижро этди. Айнан шу рол учун у биринчи марта «Оскар»ни ҳам олиши мумкин эди, лекин «Олтин глобус»ни қўлга киритди.
«Чиройли аёл»
«Чиройли аёл» – Pretty Woman 1990 йилда оммага намойиш этилган ажойиб комедия. Фильмнинг етакчи қаҳрамонлари Робертс ва Ричард Гир жуфтлиги эди. Бюджетига 14 миллион сарфланган картина кассада 463 миллион доллардан ортиқ даромад келтирди. Кейинчалик у «Оскар», «Олтин глобус» ва «Экран актёрлари гильдияси» мукофотларини олишга муваффақ бўлди.
Шахсий ҳаёт
Жулиянинг таниқли мусиқачиси Лайл Ловетт билан биринчи никоҳи муваффақиятли бўлмади, жуфтлик икки йилдан кейин ажрашди. Актриса 2002 йилда оператор Дениел Модерга турмушга чиқди. Сўнгра улар қиз ва ўғил эгизак фарзанд кўрди, орадан вақт ўтиб, оилада учинчи фарзанд дунёга келди. Айни пайтда актриса фарзандлари билан Нью-Йоркнинг Maлибу шаҳрида яшайди.
Синглисининг фожиали ўлими
Жулиянинг синглиси Нэнси ўттиз етти ёшида гиёҳванд моддалар қабул қилишдан вафот этди. Ушбу воқеа жанжалсиз ўтмади. Марҳуманинг ёнидан ўз жонига қасд қилиш ҳақидаги хат топилган. Хатда қиз таниқли опаси билан муносабатларини батафсил тасвирлаб берган ва ўз жонига қасд қилишига айнан опаси сабабчи эканлигини ёзиб қолдирган. Ушбу айблов асосли эди: Жулия болалигида ортиқча вазни учун синглисини камситарди.Хайрия
Актриса бир неча бор хайрия ташкилотларига пулларини ўтказган. Масалан, у Бирлашган Миллатлар Ташкилотининг Болалар жамғармасига алоҳида маблағ ажратган. 90 йилларда у кўп вақтини Порт-о-Пренс – Гаити пойтахтида ўтказди ва у ерда маҳаллий аҳоли ўртасидаги қашшоқлик муаммосига қарши курашиш учун бор кучини сарфлади. Бундан ташқари, аёл Ретт синдроми – нейроривожланиш бузилиши ҳақидаги ҳужжатли фильмда роль ўйнади.
Ижтимоий тармоқлар
Жулининг Instagram’даги расмий @juliaroberts аккаунти 10 миллионга яқин обуначига эга. У шахсий ҳаётидаги суратларни жойлаштиришни яхши кўради, шунингдек, фолловерларни кино афишалари ва суратга олиш майдончасидаги кадрлар билан хурсанд қилади.
Қизил йўлакчадаги жанжал
Америкалик актриса Канн кинофестивалининг қизил йўлагида яланг оёқ юришга қарорга қилди. У Жорж Клуни билан маросимда пайдо бўлди ва зинапояга кўтарила бошлаган бир пайтда туфлисини ечди. Актриса бу кутилмаган ҳаракатни тушунтирмади. Оммавий ахборот воситалари вакиллари бу фактни ўзига хос норозилик билан боғлай бошлади, чунки ўтган йилги кинофестивалда ташкилотчилар пошнасиз туфли кийган аёлларни ичкарига киритишни истамаган эди.
Актриса ҳақида қизиқарли қисқа фактлар- Робертс бўш вақтида яланг оёқ юришни яхши кўради. У ҳатто тўй маросимига ҳам шундай қатнашган.
- Жулия чапақай, лекин ўнг қўли билан ҳам ёзиши мумкин.
- Актриса кўплаб машҳур журналлар версияларига кўра, дунёнинг энг гўзал одамлари рўйхатида бир неча бор биринчи ўринни эгаллаган.
- Жулининг жияни – машҳур актриса Эмма Робертс.
- Бир марта актриса оиласини чиройли тарзда суратга олишни истаган журналистни уриб юборган.
- «Мона Лизанинг табассуми» картинаси актрисага 25 миллион доллар миқдоридаги катта гонорар келтирди. Илгари ҳеч бир актриса бундай катта мукофотни олмаган.
- Жулиянинг иккинчи тўй маросимида машҳур актёр Брюс Уиллис иштирок этган.
- Актриса бўш вақтида бирор нарса тўқишни яхши кўради.
- Робертс узоқ вақт давомида жуда ёмон одатдан азият чеккан, у доимо тирноқларини чайнаган.
- Жулия канадалик актёр Кифер Сазерденга турмушга чиқишига бир неча кун қолганда, қочиб кетган.
- Жулия машҳур ёзувчи Пауло Коэлонинг асарларини ўқишни яхши кўради.
Изоҳ (0)